Bas múfti Naýryzbai qajy Taǵanuly biyl elimizde Ramazan aiy 24 sáýir kúni bastalatynyn aitty, - dep habarlaidy «Ult aqparat».
«Qazaqstan musylmandary dini basqarmasy elimizdegi irgeli zertteý ortalyqtarynyń biri bolyp tabylatyn V.G.Fesenkov atyndaǵy «Ulttyq ǵaryshtyq zertteýler men tehnologiialar ortalyǵy» mekemesiniń ǵylymi málimetine súienip, sondai-aq kórshi Ózbekstan jáne Qyrǵyzstan musylmandary dini basqarmalarymen keńesip, Ramazan aiynyń bastalatyn kúnin belgiledi. Shariǵat úkimi men ǵylymi zertteý jumysynyń qorytyndysyna sáikes, musylmandar asyǵa kútetin ramazan aiy biyl elimizde 24 sáýir kúni bastalatyn boldy», - dedi Bas múfti.
Osy oraida ol shariǵat boiynsha baliǵatqa tolǵan, aqyl-esi durys árbir musylmanǵa ramazan aiynda oraza ustaý paryz ekenin eske saldy.
«Alaida, jolaýshylarǵa, syrqattanǵan nemese densaýlyǵy nashar adamdar aýrýynyń asqynýynan qaýiptense jáne senimdi dáriger uzaq ýaqyt boiy ashyǵýdan densaýlyǵy kúrt nasharlap ketýi múmkin degen sheshim qabyldasa, sondai-aq júkti nemese omyraýda balasy bar áielderge oraza tutýdy keiinge qaldyrýǵa shariǵat ruqsat beredi», - dedi Naýryzbai qajy Taǵanuly.
Sondai-aq, karantin kúnderi árkim óz shańyraǵynda otbasy múshelerimen aýyzashar ótkizýi kerek.
«Juqpaly indettiń taralýynyń aldyn alý maqsatynda meshitterde, dámhanalarda, qoǵamdyq oryndarda jáne basqa da mekemelerde jinalyp, aýyzashar berýdi ýaqytsha toqtatýǵa shaqyramyz. Sondyqtan karantin kúnderi árkim óz shańyraǵynda otbasy múshelerimen aýyzashar ótkizýge, kópshilik oryndarda (dámhana, meiramhana) jinalmaýǵa úndeimiz», - dedi Bas múfti Ortalyq kommýnikatsiialar qyzmetindegi brifingide.
Bas múfti Naýryzbai qajy Taǵanulynyń aitýynsha, árkim taraýyq namazyn óz shańyraǵynda otbasy múshelerimen oqýy kerek.
«Qazaqstan musylmandary dini basqarmasy elimizdegi tótenshe jaǵdaiǵa bailanysty qasietti Ramazan aiynda indettiń taralýynyń aldyn alý maqsatynda, karantin merziminde taraýyq namazy meshitterimizde jamaǵatpen oqylmaitynyn málimdeidi. Árkim taraýyq namazyn óz shańyraǵynda otbasy múshelerimen oqýyna keńes beremiz. Biz osylai oqshaýlaný arqyly juqpaly indetti jeńemiz», - dedi Bas múfti.
