Senat tóraǵasy Máýlen Áshimbaev Parlament qabyldaǵan Táýelsizdiktiń 30 jyldyǵyna arnalǵan raqymshylyq týraly zańyna qatysty pikir bildirdi, dep habarlaidy QazAqparat.
«Búgin biz Memleket basshysynyń tapsyrmasy boiynsha daiyndalǵan mańyzdy zańdy qabyldadyq. Raqymshylyq – bul gýmanizm aktisi, zańdy buzǵan adamdarǵa qatysty memlekettiń izgi nieti men bildirgen senimi. Ol ardagerlerge, kámelet jasyna tolmaǵandarǵa, egde jastaǵy azamattarǵa, birinshi ári ekinshi toptaǵy múgedekterge jáne azamattar men memlekettiń qaýipsizdigine asa qater tóndirmeitin adamdarǵa qatysty qoldanylady», - dedi M. Áshimbaev.
Onyń aitýynsha, qabyldanǵan zań neǵurlym qaýipti qylmysqa barǵan adamdarǵa raqymshylyq jasaýǵa tyiym salady.
«Aldaǵy ýaqytta bul qujat zań buzǵan adamdarǵa buryn jasaǵan qatelikterin qaitalamai, jańa ómir bastaýyna múmkindik beredi dep senemiz», - dedi Senat tóraǵasy.
Óz kezeginde senator Saýle Aitpaeva zań raqymshylyq jasaýdy qoldanýdyń sharttary men tártibin, ony engizý kúninen bastap 6 ai ishinde ony oryndaý jónindegi merzimderdi kózdeitinin, sondai-aq Úkimet pen jergilikti atqarýshy organdardyń tiisti sharalardy iske asyrý, onyń ishinde bosatylatyn adamdardy ornalastyrý, jumysqa ornalastyrý, emdeý, olarǵa áleýmettik jáne ózge de kómek kórsetý jónindegi quzyretin bekitetinin aitty.
«Qylmystyq kodekstiń 78-babynda raqymshylyq jasaý aktisin qabyldaýdyń jáne ony taratý sheńberiniń jalpy ólshemderi aiqyndalǵan. Zań jobasy Qylmystyq kodekstiń erejelerine tolyq sáikes keledi. Ol raqymshylyq jasaý qoldanylmaityn adamdar tobyn aiqyndaityn tizbe belgilenedi», - dedi S. Aitpaeva.
Zań jobasyn iske asyrýdan kútiletin nátijeler:
- sottalǵan adamdardy jazadan bosatýǵa bailanysty túrmede otyrǵandardy azaitý;
- probatsiialyq baqylaýdaǵy sottalǵandar sanyn azaitý;
- áleýmettik osal adamdar sanatyndaǵy jáne zalaldy ótegen sottalǵandarǵa jazanyń ótelmegen bóliginiń merzimderin qysqartý;
- qylmystyq isterdi toqtatý jáne qylmystyq teris qylyqtar jáne onsha aýyr emes qylmystar jasaǵan adamdardy, aýyrlyǵy ortasha qylmystar jasaǵan áleýmettik osal adamdardy qylmystyq jaýaptylyqtan jáne jazadan bosatý.
