Búgin 62 jasqa qaraǵan shaǵynda Qazaqstannyń eńbek sińirgen qairatkeri, Mahambet syilyǵynyń laýreaty, jazýshy-dramatýrg Rahymjan Otarbaev ómirden ótti. Qaiǵyly qazaǵa jazýshynyń bir top zamandastary men qalamger inileri feisbýk áleýmettik jelisinde kóńil aitty.
***
Rahymjan Otarbaev?! Dúnieden ótti degenge sene almai otyrmyn. Qandai azamat... Alǵash kórgenimde Jumeken aǵa ekeýmizdi ózi tanystyryp: "Jastaryń qatar, birge júrińder. Rahymjan inim elden, Atyraýdan endi keldi, sen buǵan bas-kóz bop júr" dep tapsyryp, batasyn berip edi... Bas-kóz bola almadym... Noqta kiip kórmegen asaýǵa qalai ie bolarsyń!? Men oǵan "Qabyrǵasy qaraǵaidai qaba jaldy qara aiǵyr" degen at qoiǵan edim. Jolyqqanda osy teńeýimdi qysqa qaiyrsam: "Sen meniń titýldarymdy túgeldep, tolyǵymen ait!" dep, aqsiia kúlip, qobyraǵan shashyn joǵaryǵa bir silkip qoiatyn. Qaita týmas qazaq, qaitalanbas qalamger ǵoi. Netken ókinishti... Baqul bol, baýyrym!
Ulyqbek Esdáýlet
***
Rahymjan Otarbaevtyń qazasyna kóńilim senbei otyr edi... Feisbýktegi aǵaiynnyń kúńirengen úni men zarly joqtaýy aqyry moiyndatty. Baýyrymyzdyń jany jannatta bolsyn! Rahymjan artynda qalǵan urpaǵy, qazaq degen eli, altyn qalamynan týǵan keremet týyndylary turǵanda bizben birge jasai beredi. Eńselerińdi kóterińder, erlerim! Rahymjandai ul týyńdar, áielder!
Baibota Qoshym-Noǵai
***
Bir keiipkerińniń aýzymen aitqan sóziń bar edi: "dúnie jalǵan emes, adam - jalǵan". Búgin de Qudaidyń tańy atty. Biraq sen joqsyń! Ózekti órtep kettiń! Kieli sózdiń túrmesinen sen qashyp shyqtyń! Endi halqyń seni birjola aialaýǵa aýysatyn bolady! Jalǵan ómirińnen qutyldyń, Raha, naǵyz ómiriń búgin bastaldy! Basyń syimai ketken dúniege janyń siiatynyn bilip ketkenińdi sezemin! Jazýshynyń budan asqan jeńisi bolmaidy. Osy ǵana medeý.
Sharhan Qazǵul
***
Jurt ázildep otyrǵan shyǵar dep oiladym basynda. Qudaimen de oinap, ajalmen de qaljyńdasyp otyratyn el edik qoi. Senbedim. Uiqydan oianyp, úidiń ishinde anany istegensip, mynany istegensip sendelip júrip aldym. Kóz aldymnan Raqymjan aǵanyń fotolary qaptap ketken lenta keter emes. Shirkin-ai, quryǵanda túsim bolsaishy! Bul qalai sonda?! Nege? Qalai?! Qalai kete saldy?! Ketetin kisi Raqymjan aǵa ma edi?! Myna qyryq kórpe bop bólinip, qyryq pyshaq tóbeleske ázir turatyn qazaǵyna "táit!" dep ursyp turyp, ataly sózin aitar shaǵynda adam kete me?! Senbeimin! Duǵaǵa qosar az ǵana aǵalarymnyń ishine kiretinińizdi kúni keshe oilap pa edim men...
Ekeýmiz tylsym taqyryptarǵa qatysty suxbat-kitap jazamyz dep júrgen edik. Men sizge "Raqymjan aǵa, Siz menimen ol kitapty jazýǵa áli daiyn emessiz ǵoi!" - dep ázildeitin edim. Siz tańqalǵandai bop "Apyrai, á!" dep meniń ishek-silemdi qatyrýshy edińiz... Qaiteiin-ai, qaiteiin... Alla Raqymyna bólesin, jan aǵamdy. Janyńyz peiishte shalqysynshy, jan Aǵam!
Aqberen Elgezek
***
Senbei otyrmyn... Sengim de kelmeidi! Raxymjan aǵam dúnieden ozdy dep xabarlap jatyr Atyraý jaqtan. Eldiń ary da, sózi de, kim bar dese kórseter, ózi de Ózi edi...
...Bala kezimizde Raxymjan aǵam Almatyǵa syimai, Shardaraǵa keletin. Teńizdiń jaǵasynan jany jai tabatyn. Aqkókem ekeýi Qyzyl qumnyń tabanyna qyzdyrylyp jatyp, kúndi kúreń sháimen batyryp, tańdy áńgimemen atyratyn.
...Ótken jyldyń qatal qańtarynda ákemizdi jerlep, Quran oqylǵan soń, "Dostym, bir kúni sen ótken esiktiń tabaldyryǵynan men de attarmyn" dep qyzýy basylmaǵan topyraqty taramys alaqanymen sipalap otyryp bir kúrsinip edi.
...Aqkókem men Raxymjan aǵamnyń arasy bir-aq jas. Týǵan jyly ǵana emes, qaitar jylynyń arasy da bir jyl bolatynyn kim bilgen! 61-diń músheli alyp ketti, alyp ketti ákemdi de, aǵamdy da.
...Byltyr ákemniń beiitiniń basynda kúnsiz kókjiekke kitap oqyǵandai kóz júgirtip, "Jatar jerimdi men de belgilep qoidym, Shyńǵysjan. Basyna qashalar bir shýmaqty balamnyń qolyna ustattym. Myna dúnie maǵan tolyq túrin kórsetpedi, jarty júzin ǵana kórsetti. Meniń basyma da betimniń jartysyn qoiamyn. Men de qasqiyp jarty betimmen qarap turamyn qý dúniege" dep edi. Osy sózder, kúi dombyradai kúmbirlegen daýsynyń jańǵyryǵy qulaq qudyǵymda kúni keshegidei sairap tur. Sizdiń daýsyńyz eldiń boiynda, jazýyńyz eldiń oiynda máńgilik jańǵyra bermek, aǵa! Baqul bolyńyz!
"Elmerei jalǵyz deýshi edińiz, endi bizge de áke bolasyz" degenimizge kóp bolmap edi. Dál qazir ózimdi tolyq jetim qalǵandai sezinip otyrmyn. "Myna eki shal men eki kempirdi baǵý - senderdiń moiyndaryńdy" deýshi edi aǵamyz, Sáýle apai. Endi ákemizdiń ekeýi de joq. Sizder qaldyńyzdar. Alla taǵala Sizderge ǵumyr bergei! Urpaqtaryn uzaǵynan súiindirgei. Jazýshysyn erkeletken elge, alaqanynda aialaǵan Atyraýǵa kóńil aitamyz!
Shyńǵys Muqan
