Dýshanbe qalasy prokýratýrasynyń bólim bastyǵy Jaloliddin Pirov sáýirdiń 19-yna tańerteń qaitys boldy. Ol 13 sáýirde tynys alýy qiyndaǵan soń aýrýhanaǵa jatqyzylǵan. Tájikstan densaýlyq saqtaý ministrligi ony "pnevmoniia men H1N1 tumaýynan qaitys boldy, koronavirýs infektsiiasy joq" dep habarlady. Alaida, Azattyqtyń Tájik qyzmetiniń habarlaýynsha, Pirovpen bir palatada bolǵandardyń bári karantinge jiberilgen.
"Test koronavirýs joqtyǵyn kórsetti, biraq saqtyq úshin týystarynyń bári karantinge alyndy. Densaýlyqtary birqalypty", – dep málimdedi Tájikstan densaýlyq saqtaý ministrligi. Dýshanbe mektebinde sabaq beretin sheshesi de uly qaitys bolǵan soń barlyq oqýshylarymen birge karantinge jatqyzylǵan degen habar bar.
Qaitys bolǵan Pirovtyń týystarynyń sózinshe, onyń tabytqa salynǵan denesin qorǵanys kiimin kigen meditsina qyzmetkerleri jedel járdemmen ákelgen. Qoshtasýǵa az ýaqyt berip, tabytty ashýǵa ruqsat bermei, dereý jerleýge áketken.
Prokýror Dýshanbedegi infektsiia aýrýhanasyna 13 sáýirde "pnevmoniia" diagnozymen túsken. "Ahbor" portalynyń málimetterine qaraǵanda, ol jaqynda ǵana shetelge baryp kelgen, biraq tanys-tamyrlaryn paidalanyp 14 kún mindetti karantinge jatpaǵan.
Buryn Tájikstan densaýlyq saqtaý minisrligi Bohtar qalasynda aýrýhananyń 58 jastaǵy qyzmetkeri qaitys bolǵanyn habarlaǵan edi. Ol Tájikstannyń Reseiden kelgen 400-dei azamaty karantinde jatqan aýmaqty jumys istegen. Alaida tájik biligi medbike koronavirýstan emes "qurt aýrýynan jáne júrek syrqatynan óldi" dep jariialaǵan.
Prezident Emomali Rahmon biligi "Tájikstan aýmaǵynda koronavirýs joq" dep sanaidy. Pnevmoniiadan ólgenderdiń kút kóbeigenin "pnevmoniianyń belgili bir kezeń men aýa-raiyna bailanysty qozatynynan" kóredi.
