دۋشانبە قالاسى پروكۋراتۋراسىنىڭ بٶلٸم باستىعى جالوليددين پيروۆ سەۋٸردٸڭ 19-ىنا تاڭەرتەڭ قايتىس بولدى. ول 13 سەۋٸردە تىنىس الۋى قيىنداعان سوڭ اۋرۋحاناعا جاتقىزىلعان. تەجٸكستان دەنساۋلىق ساقتاۋ مينيسترلٸگٸ ونى "پنەۆمونييا مەن H1N1 تۇماۋىنان قايتىس بولدى, كوروناۆيرۋس ينفەكتسيياسى جوق" دەپ حابارلادى. الايدا, ازاتتىقتىڭ تەجٸك قىزمەتٸنٸڭ حابارلاۋىنشا, پيروۆپەن بٸر پالاتادا بولعانداردىڭ بەرٸ كارانتينگە جٸبەرٸلگەن.
"تەست كوروناۆيرۋس جوقتىعىن كٶرسەتتٸ, بٸراق ساقتىق ٷشٸن تۋىستارىنىڭ بەرٸ كارانتينگە الىندى. دەنساۋلىقتارى بٸرقالىپتى", – دەپ مەلٸمدەدٸ تەجٸكستان دەنساۋلىق ساقتاۋ مينيسترلٸگٸ. دۋشانبە مەكتەبٸندە ساباق بەرەتٸن شەشەسٸ دە ۇلى قايتىس بولعان سوڭ بارلىق وقۋشىلارىمەن بٸرگە كارانتينگە جاتقىزىلعان دەگەن حابار بار.
قايتىس بولعان پيروۆتىڭ تۋىستارىنىڭ سٶزٸنشە, ونىڭ تابىتقا سالىنعان دەنەسٸن قورعانىس كيٸمٸن كيگەن مەديتسينا قىزمەتكەرلەرٸ جەدەل جەردەممەن ەكەلگەن. قوشتاسۋعا از ۋاقىت بەرٸپ, تابىتتى اشۋعا رۇقسات بەرمەي, دەرەۋ جەرلەۋگە ەكەتكەن.
پروكۋرور دۋشانبەدەگٸ ينفەكتسييا اۋرۋحاناسىنا 13 سەۋٸردە "پنەۆمونييا" دياگنوزىمەن تٷسكەن. "احبور" پورتالىنىڭ مەلٸمەتتەرٸنە قاراعاندا, ول جاقىندا عانا شەتەلگە بارىپ كەلگەن, بٸراق تانىس-تامىرلارىن پايدالانىپ 14 كٷن مٸندەتتٸ كارانتينگە جاتپاعان.
بۇرىن تەجٸكستان دەنساۋلىق ساقتاۋ مينيسرلٸگٸ بوحتار قالاسىندا اۋرۋحانانىڭ 58 جاستاعى قىزمەتكەرٸ قايتىس بولعانىن حابارلاعان ەدٸ. ول تەجٸكستاننىڭ رەسەيدەن كەلگەن 400-دەي ازاماتى كارانتيندە جاتقان اۋماقتى جۇمىس ٸستەگەن. الايدا تەجٸك بيلٸگٸ مەدبيكە كوروناۆيرۋستان ەمەس "قۇرت اۋرۋىنان جەنە جٷرەك سىرقاتىنان ٶلدٸ" دەپ جارييالاعان.
پرەزيدەنت ەمومالي راحمون بيلٸگٸ "تەجٸكستان اۋماعىندا كوروناۆيرۋس جوق" دەپ سانايدى. پنەۆمونييادان ٶلگەندەردٸڭ كٷت كٶبەيگەنٸن "پنەۆمونييانىڭ بەلگٸلٸ بٸر كەزەڭ مەن اۋا-رايىنا بايلانىستى قوزاتىنىنان" كٶرەدٸ.
