قازاق ٶنەرٸندە اتا-اناسىنىڭ جولىن جالعاپ, كٶپشٸلٸككە تانىلعان جۇلدىزدار از ەمەس. بٸرٸ بالا كەزٸنەن ساحنانىڭ ورتاسىندا ٶسسە, ەندٸ بٸرٸ مٷلدە باسقا ماماندىقتى تاڭداعانىمەن, كەيٸن ٶنەرگە بەت بۇرعان. الايدا تانىمال ادامنىڭ پەرزەنتٸ بولۋ ەردايىم وڭاي ەمەس. ٶيتكەنٸ ولاردىڭ ەر قادامى اتا-اناسىنىڭ جەتٸستٸگٸمەن سالىستىرىلىپ وتىرادى. وسى ورايدا Ult.kz تٸلشٸسٸ ٶنەرلٸ وتباسىندا تەربيەلەنٸپ, شىعارماشىلىق جولىن تاڭداعان تانىمال تۇلعالار تۋرالى مەلٸمەتتەر مەن ولاردىڭ سۇحباتتارىن جيناقتادى.
1. روزا رىمباەۆانىڭ ۇلدارى: ەلي مەن مەدي وقاپوۆتار
قازاقستاننىڭ حالىق ەرتٸسٸ روزا رىمباەۆانىڭ ەكٸ ۇلى – ەلي وقاپوۆ پەن مەدي رىمباەۆ تا ٶمٸرٸن مۋزىكامەن بايلانىستىرعان. ەلي جەكە ورىنداۋشى رەتٸندە تانىلىپ, وتاندىق ەسترادادان ٶز ورنىن تاپسا, مەدي دە ەنشٸلٸك پەن مۋزىكالىق شىعارماشىلىقتى تاڭدادى. ولاردىڭ ەكەسٸ, مارقۇم تاسقىن وقاپوۆ بەلگٸلٸ ديريجەر بولعان جەنە روزا رىمباەۆانىڭ ٶنەردەگٸ جەتٸستٸكتەرٸنە ٷلكەن ٷلەس قوسقان.
الايدا ەنشٸ باستاپقىدا ەكٸ ۇلىنىڭ دا ٶنەر جولىن قۋعانىن قالاماعانىن جاسىرمايدى. ول 2017 جىلى "گۋ-گۋ-گەپ" باعدارلاماسىنا بەرگەن سۇحباتىندا بالالارىن تٸل ٷيرەنۋگە, ماتەماتيكا مەن فيزيكا باعىتىندا بٸلٸم الۋعا دايىنداعانىن ايتقان.
"ەكٸ ۇلىمدى دا مۋزىكاعا بەرەمٸن دەپ ويلاعان جوقپىن. تٸل جاعىنان جەنە دە ماتەماتيكا, فيزيكا مەكتەبٸنە دايىندالعانبىز. بٸراق ەكەۋٸ دە مۋزىكانى تاڭداپ الدى", – دەگەن ەنشٸ.
روزا رىمباەۆا ۇلدارىنىڭ تاڭداۋىنا كەيٸن ٶكٸنبەگەنٸن جەتكٸزگەن. ال 2018 جىلى "كەزدەر-اي" باعدارلاماسىندا ولاردىڭ شىعارماشىلىعىنا قاتىستى پٸكٸر بٸلدٸرٸپ, بالالارىنىڭ تابىسقا ٶز ەڭبەگٸمەن جەتكەنٸن قالايتىنىن ايتقان. ەنشٸ ۇلدارىنىڭ كونتسەرتتەرگە قاتىسۋى ٷشٸن ەشكٸمنەن ارنايى ٶتٸنٸش جاساماعانىن دا اتاپ ٶتكەن.
مەدي رىمباەۆ بولسا, TALKLIKE باعدارلاماسىندا تانىمال وتباسىنان شىققان ادام رەتٸندە سىن-پٸكٸرگە جيٸ تاپ بولاتىنىن جەتكٸزگەن. ونىڭ سٶزٸنشە, ٶزٸ تۋرالى ايتىلعان جاعىمسىز پٸكٸرگە تٶزە الادى, بٸراق وتباسى مٷشەلەرٸنە تٸل تيگٸزٸلگەنٸن قابىلداي المايدى. وسىلايشا رىمباەۆانىڭ ۇلدارى ەكە-شەشەسٸنەن دارىعان مۋزىكالىق قابٸلەتتٸ ٶز شىعارماشىلىعىمەن جالعاستىرىپ كەلەدٸ.
2. ديماش قۇدايبەرگەن: اتا-اناسىنىڭ جولىن جالعاپ, ەلەمدٸك ساحناعا شىققان ەنشٸ
ەلەمگە تانىلعان قازاقستاندىق ەنشٸ ديماش قۇدايبەرگەن دە ٶنەرلٸ وتباسىندا دٷنيەگە كەلگەن. ونىڭ ەكەسٸ قانات ايتباەۆ پەن اناسى سۆەتلانا ايتباەۆا – قازاقستاننىڭ ەڭبەك سٸڭٸرگەن قايراتكەرلەرٸ. ديماش كٸشكەنتايىنان مۋزىكاعا جاقىن ٶسٸپ, كەسٸبي بٸلٸم الۋدى ەرتە باستاعان.
ول احمەت جۇبانوۆ اتىنداعى مۋزىكا مەكتەبٸندە, كەيٸن مۋزىكا كوللەدجٸ مەن قازاق ۇلتتىق ٶنەر ۋنيۆەرسيتەتٸندە بٸلٸم العان. ەنشٸ 2015 جىلى بەلارۋستەگٸ "سلاۆيان بازارى" بايقاۋىندا باس جٷلدە يەلەنٸپ, 2017 جىلى قىتايداعى Singer جوباسىنا قاتىسۋ ارقىلى حالىقارالىق اۋديتوريياعا كەڭٸنەن تانىلدى.
ديماشتىڭ اتا-اناسى ونىڭ شىعارماشىلىق جولىندا ٷنەمٸ قولداۋ كٶرسەتٸپ كەلەدٸ. قانات ايتباەۆ Jibek Joly تەلەارناسىنىڭ "بٷگٸن LIVE" باعدارلاماسىندا وتباسىنداعى تەربيەنٸڭ نەگٸزٸ اتا-انانىڭ ٶز ٶنەگەسٸندە ەكەنٸن ايتقان.
"بٸزگە ٶز اتا-انامىز ٷلگٸ بولدى. ولاردىڭ بولمىسى, ٶزارا قارىم-قاتىناسى تەربيە مەكتەبٸ ٸسپەتتٸ", – دەگەن ول.
سول سۇحباتتا قانات ايتباەۆ ديماشتى ٶتكٸر مٸنەزدٸ, قايسار ەرٸ جٷرەگٸ جۇمساق ادام رەتٸندە سيپاتتاعان. ال 2026 جىلعى قازاندا قانات پەن سۆەتلانا ايتباەۆتار پولشاداعى Radio Dimash راديوستانتسيياسىنا سۇحبات بەرٸپ, ۇلدارىنىڭ بالالىق شاعىن جەنە شىعارماشىلىق جولىن ەسكە الدى.
بٷگٸندە ديماش اتا-اناسىنىڭ ٶنەردەگٸ جولىن جالعاستىرىپ قانا قويماي, قازاق ەنٸن حالىقارالىق ساحناعا شىعارىپ جٷرگەن ورىنداۋشىلاردىڭ بٸرٸنە اينالدى.
3. ساعي ەشٸموۆ: ەكەسٸنٸڭ قاتال تالابىنان شىڭدالعان اكتەر
قازاق كينوسىنىڭ كٶرنەكتٸ ٶكٸلٸ اسانەلٸ ەشٸموۆتٸڭ ۇلى ساعي ەشٸموۆ ەكە جولىن جالعاپ, اكتەرلٸك ٶنەردە ٶز قولتاڭباسىن قالدىردى. ول ەسٸرەسە "شوقان ۋەليحانوۆ" تەلەحيكاياسىنداعى باستى رٶلٸ ارقىلى كٶپشٸلٸككە كەڭٸنەن تانىلدى. الايدا بۇل رٶلدٸ سومداۋ جاس اكتەرگە وڭايعا تٷسپەگەن.
ساعي ەشٸموۆ 1999 جىلى قىركٷيەكتە بەرگەن سوڭعى سۇحباتىندا ەكەسٸمەن بٸرگە جۇمىس ٸستەگەن كەزٸندەگٸ ەرەكشە وقيعانى ەسكە العان. ونىڭ ايتۋىنشا, تٷسٸرٸلٸم بارىسىندا اسانەلٸ ەشٸموۆ ۇلىنىڭ ويىنىنا كٶڭٸلٸ تولماي, قاتتى سىن ايتقان. ەكەسٸنٸڭ سٶزٸن اۋىر قابىلداعان ساعي كيٸز ٷيدە جالعىز قالىپ, تٷنٸ بويى جىلاعانىن جاسىرماعان. ەرتەڭٸنە رەجيسسەر ۇلىنىڭ شارشاعان, جٷدەۋ جٷزٸن كٶرٸپ, دەل سول سەتتٸ ناۋقاس شوقاننىڭ بەينەسٸن تٷسٸرۋگە پايدالانعان. اكتەر كەيٸن سول كٷندەرٸ ەكەسٸنە قاتتى رەنجٸگەنٸن مويىنداعان. دەگەنمەن ەكە مەن بالانىڭ بٸرلەسكەن ەڭبەگٸ نەتيجەسٸندە "شوقان ۋەليحانوۆ" فيلمٸ جارىق كٶرٸپ, ساعي ەشٸموۆ مەملەكەتتٸك سىيلىقتىڭ يەگەرٸ اتاندى.
ٶكٸنٸشكە قاراي, اكتەر 1999 جىلعى 18 قازاندا نەبەرٸ 38 جاسىندا ٶمٸردەن ٶتتٸ.
4. نۇرلان ٶنەرباەۆتىڭ ۇلدارى: بٸرٸ ەكونوميست, بٸرٸ كەسٸبي پيانيست بولدى
تانىمال ەنشٸ نۇرلان ٶنەرباەۆتىڭ ۇلدارى ماقسات ٶنەرباي مەن مارعۇلان نۇرلان دا ەكەلەرٸنٸڭ شىعارماشىلىق جولىن جالعاستىرىپ كەلەدٸ. الايدا ولاردىڭ ٶنەرگە كەلۋ تاريحى بٸر-بٸرٸنە ۇقسامايدى. ٷلكەن ۇلى ماقسات باستاپقىدا ەكونوميست ماماندىعىن مەڭگەرٸپ, كەيٸن زاڭگەرلٸك بٸلٸم العان جەنە وسى سالادا جۇمىس ٸستەگەن.
بٸراق ۋاقىت ٶتە مۋزىكاعا دەگەن قىزىعۋشىلىعى باسىم تٷسٸپ, ساحناعا ورالعان. نۇرلان ٶنەرباەۆ Jibek Joly تەلەارناسىنىڭ "بٷگٸن LIVE" باعدارلاماسىندا بالالارىنا ماماندىق تاڭداۋعا قاتىستى تالاپ قويماعانىن ايتقان.
"ماقساتتىڭ العاشقى ماماندىعى – ەكونوميست. ودان كەيٸن زاڭگەرلٸكتٸ وقىدى. بۇل سالادا جۇمىس تا ٸستەدٸ. بٸراق بويدا بار قاسيەت بەرٸبٸر جاتپايدى ەكەن عوي", – دەگەن ەنشٸ.
ال كەنجە ۇلى مارعۇلان بەس جاسىنان مۋزىكامەن اينالىسىپ, التى جاسىندا كٷلەش بايسەيٸتوۆا اتىنداعى ارنايى مۋزىكا مەكتەبٸنە قابىلدانعان. كەيٸن مۋزىكالىق بٸلٸمٸن جالعاستىرىپ, كەسٸبي پيانيست اتاندى جەنە ۇستازدىق قىزمەتپەن اينالىسا باستادى.
مارعۇلان سۇحباتتارىنىڭ بٸرٸندە تانىمال ادامنىڭ بالاسى بولۋ ٷلكەن جاۋاپكەرشٸلٸك جٷكتەيتٸنٸن مويىنداعان. ونىڭ ايتۋىنشا, جۇرت ولاردى ٷنەمٸ ەكەسٸمەن سالىستىرادى, سوندىقتان ٶنەردەگٸ ەر جەتٸستٸگٸن ٶز ەڭبەگٸمەن دەلەلدەۋگە تىرىسادى. وسىلايشا ماقسات پەن مارعۇلان ەكە جولىن ەرتٷرلٸ باعىتتا جالعاستىرىپ, بٸر وتباسىنان شىققان ەكٸ ٶنەرپاز رەتٸندە ٶز شىعارماشىلىعىن دامىتىپ كەلەدٸ.
5. ايجۇلدىز ادايبەكوۆا: جانار ايجانوۆانىڭ قىزى ٶز جولىن قالاي قالىپتاستىردى?
قازاقستاننىڭ ەڭبەك سٸڭٸرگەن قايراتكەرٸ, ەنشٸ ەرٸ اكتريسا جانار ايجانوۆانىڭ قىزى ايجۇلدىز ادايبەكوۆا دا شىعارماشىلىق سالاسىندا تانىلعان. الايدا ول اناسىنداي تەك ەنشٸلٸكپەن شەكتەلمەي, ديزاينەرلٸك, اكتەرلٸك جەنە كەسٸپكەرلٸك باعىتتاردى قاتار الىپ جٷر. ايجۇلدىز جاس كەزٸنەن سەن ەلەمٸنە قىزىعىپ, گەرمانييادا بٸلٸم الىپ, تەجٸريبە جيناعان.
2019 جىلى Kazakhstan Fashion Week اياسىندا ٶزٸنٸڭ العاشقى كيٸم توپتاماسىن تانىستىرعان. كەيٸن Mond اتتى جەكە برەندٸن دامىتىپ, ديزاينەرلٸك باعىتتا جۇمىس ٸستەي باستادى. سونىمەن بٸرگە تٷرلٸ كينو جەنە تەلەۆيزييالىق جوبالارعا قاتىسىپ, 2020 جىلى اناسىمەن بٸرگە "تاقييالى پەرٸشتە" سيتكومىنا تٷستٸ.
ايجۇلدىز 2020 جىلى كەسٸپكەر قۋانىش شونبايدىڭ YouTube ارناسىنا بەرگەن سۇحباتىندا شىعارماشىلىق جولى, كەسٸبٸ جەنە تانىمال انانىڭ قىزى بولۋدىڭ ەرەكشەلٸكتەرٸ تۋرالى ەڭگٸمەلەگەن. ال 2023 جىلى تٷركٸستانداعى تەاتر قويىلىمىندا باستى رٶلدەردٸڭ بٸرٸن سومداعان كەزدە اناسى ارنايى بارىپ, وعان توسىنسىي جاساعان.
"ەڭ بولماسا بٸر رەت كٶرٸپ كەتسە ەكەن دەپ ارماندادىم", – دەگەن ايجۇلدىز كەيٸن NTK تەلەارناسىنا بەرگەن سۇحباتىندا اناسىنىڭ قولداۋىن ەرەكشە ىقىلاسپەن ەسكە العان.
جانار ايجانوۆا دا قىزىنىڭ ٶز ەڭبەگٸمەن جەتٸستٸككە جەتٸپ جٷرگەنٸن ماقتان ەتەتٸنٸن بٸرنەشە رەت ايتقان. وسىلايشا ايجۇلدىز اناسىنىڭ شىعارماشىلىق قابٸلەتٸن بويىنا سٸڭٸرگەنٸمەن, سەن, مۋزىكا جەنە اكتەرلٸك ٶنەردٸ ۇشتاستىرىپ, ٶزٸندٸك جولىن قالىپتاستىرىپ كەلەدٸ.
ٶنەرلٸ وتباسىندا دٷنيەگە كەلۋ – ٷلكەن مٷمكٸندٸك ەرٸ زور جاۋاپكەرشٸلٸك. تانىمال اتا-انانىڭ جولىن جالعاعان ەربٸر ٶنەرپاز كٶپشٸلٸكتٸڭ نازارىندا بولىپ, ٶز قابٸلەتٸن دەلەلدەۋگە تىرىسادى. بٸرٸ وتباسىنان دارىعان تالانتىن دامىتسا, ەندٸ بٸرٸ شىعارماشىلىقتىڭ باسقا باعىتىن تاڭداپ, ٶزٸندٸك قولتاڭباسىن قالىپتاستىرادى. دەگەنمەن ٶنەردەگٸ جەتٸستٸك تەك تەكتٸلٸكپەن ٶلشەنبەيدٸ. ونىڭ ارتىندا ٷزدٸكسٸز ٸزدەنٸس, قاجىرلى ەڭبەك پەن تاباندىلىق جاتىر. ال ۇرپاقتان ۇرپاققا جالعاسقان ٶنەر قازاق مەدەنيەتٸنٸڭ دامۋىنا ٷلەس قوسىپ, جاڭا ەسٸمدەردٸڭ تانىلۋىنا جول اشىپ كەلەدٸ.
ال وقىرمان ٷشٸن قىزىعى – تانىمال اتا-انانىڭ بالاسى بولۋ ٶنەردەگٸ مٷمكٸندٸكتٸ ارتتىرا ما, ەلدە جاۋاپكەرشٸلٸكتٸ ەسەلەي مە?
