Jýyrda ǵana qyzyn uzatqan kásipker Muhtar Jákishev áleýmettik jelide kólemdi jazba jariialady, dep habarlaidy ult.kz.
Ol qyzynyń toiyn abyroimen ótkizip alǵanyna qýanyp otyrǵanyn jetkizdi.
«5 maýsym kúni qyzym Altynaidyń uzatý toiy ótti. Men Altynai úshin sheksiz baqyttymyn. Bul tańdaý kezdeisoq nemese asyǵys jasalǵan joq. Onyń negizinde shynaiy, pák mahabbat jatyr. Karl ekeýi alty jyldan beri tanys. Osydan eki jyl buryn Karl Almatyǵa arnaiy kelip, aldymnan ótti. Men óz batamdy berdim. Karl maǵan unaidy. Onyń azamattyq ustanymy durys, aldyna qoiǵan maqsattary aiqyn ári aýqymdy. Onyń eńbekqorlyǵyna, bilimine jáne alǵan betinen qaitpaityn qaisarlyǵyna qarap, kózdegen shyńdaryn baǵyndyratynyna kámil senemin. Biraq men úshin eń mańyzdysy qyzymdy shyn júrekten, tereń ári názik sezimmen súietini.
Bul toidyń máni men úshin tym bólek.
Úlken qyzym turmysqa shyqqanda men túrmede otyrdym. Ol kezde áke retinde qolymnan bar kelgeni Aigerimime arnaǵan aq tilegimdi qaǵazǵa túsirip, hatpen berip jiberý ǵana boldy. Sol hat toiynda oqyldy.
Al búgin bári basqasha.
Qyzyńnyń qýanyshynda qaǵazdaǵy qurǵaq sózben shektelmei, sózi qaǵazdan ǵana oqylatyn adam bolmaýdyń ózi bir ǵanibet. Qyzyńdy óziń uzatyp, osynaý ómirlik mańyzy bar aq bosaǵadan attar sátinde Altynaiyńa júrekjardy jyly sózderińdi óziń aita alýyń netken baqyt!
Meni tutqyndaǵanda Altynai ne bary 9 jasta ǵana edi. Bostandyqqa shyqqanymda ol jiyrmaǵa tolypty. Ol mensiz eseidi.
Ol bala kúninde-aq, meni januiamyz arqyly kórsetiletin qysymnan qutqarý úshin, týǵan úiin tastap jat jerge ketýge májbúr boldy, bóten elde ósti.
Ata-anasynyń aialy alaqany men meiirimine bólenip otyrǵan balanyń kenetten úiinen jyraqtap, jat tilde sóileitin bóten adamdar oqityn mektep-internattan bir-aq shyqqanyn túsiný qiyn. Biraq ol synbady, bárine tótep berdi. Mektepti, artynsha ýniversitetti bitirdi. Kásibi jýrnalist, tabysty model retinde tulǵa bolyp qalyptasty.
Álemniń alpaýyt kompaniialarynyń tańdaýyna ainalyp, jarnamalarynan kórinetin qyzymnyń súiikti didaryna qarap, júregim eljireidi, keýdemdi maqtanysh kerneidi.
Qyzymnyń jetken jetistikterin maqtan tutamyn. Meniń qoldaýym naǵyz kerek bolǵan shaqtarda janynda bola almaǵanyma janym aýyrady.
Altynaidy quttyqtap, onyń úilený toiyna orai aq tilegin, adal nietin bildirgen barsha janǵa shyn júrekten alǵys aitamyn!
Al keibir qisynsyz, orynsyz pikir jazyp jatqandar tek aianysh pen jiirkenish sezimin týǵyzady.
Naǵyz namys kúieý balanyń ultymen ólshenbeidi. Namys degenimiz sol namys úshin tym joǵary baǵa tóleýge týra kelgende, adamdyq aryń men abyroiyńdy taza saqtap qala alýyńmen ólshenedi. Ulttyń jamany bolmaidy. Jaman adamdar bolady», - dep jazdy ol.
