Qyzylorda qalasyndaǵy «Arai» saiabaǵynda bolǵan oqiǵadan keiin 19 jastaǵy jigittiń eki aiaǵyna ampýtatsiia jasaýǵa týra keldi, dep habarlaidy ult.kz.
Oblystyq kópbeiindi aýrýhananyń málimetinshe, zardap shegýshi jedel járdem qyzmetimen meditsinalyq mekemege asa aýyr jaǵdaida jetkizilgen. Dárigerler oǵan shuǵyl ota jasap, sol aiaǵyn sannyń joǵarǵy bóliginen, al oń aiaǵyn tobyq tusynan kesýge májbúr bolǵan.
Oblystyq kópbeiindi aýrýhananyń bas dárigeri Jasulan Baimahanovtyń aitýynsha, naýqastyń jaǵdaiy áli de óte aýyr ári turaqsyz kúide qalyp otyr.
Qaiǵyly oqiǵa 15 maýsym kúni Qyzylorda qalasyndaǵy «Arai» saiabaǵynda bolǵan. Áleýmettik jelilerde taraǵan videolar men kýágerlerdiń aitýynsha, jas jigittiń aiaqtary attraktsion mehanizmine qysylyp qalǵan.
Oqiǵadan keiin áleýmettik jelilerde zardap shegýshige qan tapsyrýǵa shaqyrǵan habarlamalar da tarady.
Qyzylorda oblystyq politsiia departamenti eńbek qaýipsizdigi talaptaryn buzý saldarynan abaisyzda adam densaýlyǵyna aýyr ziian keltirý faktisi boiynsha qylmystyq is qozǵalǵanyn málimdedi.
Vedomstvonyń habarlaýynsha, qazirgi ýaqytta oqiǵanyń barlyq mán-jaiyn jan-jaqty, tolyq ári obektivti anyqtaýǵa baǵyttalǵan tergeý áreketteri júrgizilip jatyr. Tergeý nátijesi boiynsha zań talaptaryna sáikes protsessýaldyq sheshim qabyldanady.
Istiń tergelýi Qyzylorda oblystyq politsiia departamenti basshylyǵynyń baqylaýyna alynǵan.
