Qyzylorda oblysynyń Shieli aýdanynda baǵaly metaldardy zańsyz óndirýmen ainalysqan qylmystyq toptyń qyzmeti toqtatyldy. Arnaiy operatsiiany Qarjylyq monitoring agenttiginiń oblystyq departamenti prokýratýranyń úilestirýimen jáne Ulttyq qaýipsizdik komiteti departamentimen birlesip júrgizdi, dep habarlaidy ult.kz.
Tergeý málimetinshe, qylmystyq top Jamankól shatqalynda tabiǵi altyndy zańsyz óndirip kelgen. Alynǵan altyn kúrdeli óndiristik óńdeýdi qajet etpegen.
Quqyq qorǵaý organdarynyń dereginshe, top músheleriniń arasynda mindetter naqty bólingen. Biri altyn óndirý jumystaryn uiymdastyryp, jumysshylardy tartsa, endi biri óndirilgen metaldy tasymaldaý men satýǵa jaýap bergen. Taǵy bir bóligi qaýipsizdikti qamtamasyz etken.
Zańsyz qyzmetti jasyrý úshin ken ornynyń ainalasyna baqylaýshylar qoiylyp, mototsikl mingen adamdar aýmaqty torýyldap otyrǵan. Olar bógde adamdardyń nemese memlekettik organdar qyzmetkerleriniń kelýi týraly aldyn ala eskertip otyrǵan.
Tergeý barysynda zańsyz óndirilgen altynnyń Almatyǵa jetkizilip, satylǵany jáne odan túsken qarjy qylmystyq top músheleri arasynda bólingeni anyqtalǵan.
Tintý kezinde quramynda altyny bar 500 gramnan astam shikizat, eki arnaiy tehnika, 12 metall izdegish jáne alty avtokólik tárkilendi. Sonymen qatar eki pnevmatikalyq tapansha men bir tegis uńǵyly myltyq tabylǵan.
Qazirgi ýaqytta osy is boiynsha 13 adam qamaýǵa alyndy. Tergeý jalǵasyp jatyr.
