Qyrǵyzstannyń burynǵy ministri men eks-depýtaty AQSh-ta kýrer bolyp jumys istep júr, dep habarlaidy ult.kz.
Áleýmettik jelilerde Qyrǵyzstannyń burynǵy eńbek jáne áleýmettik damý ministri, eks-depýtat Ýlýkbek Kochkorovtyń qazirgi ómiri qyzý talqylanýda.
Taraǵan videoda saiasatkerdiń AQSh-tyń Chikago qalasynda jetkizý qyzmetiniń kýreri bolyp eńbek etip júrgeni kórsetilgen. Jeli qoldanýshylarynyń aitýynsha, ol qazir Amazon kompaniiasynyń tapsyrystaryn jetkizýmen ainalysady.
Ýlýkbek Kochkorov Qyrǵyzstan saiasatynda tanymal tulǵalardyń biri bolǵan. Ol kezinde «Ata-Jurt» partiiasynan depýtat atanyp, 2017 jylǵy prezident sailaýyna qatysqan. Al 2018 jyly Qyrǵyzstannyń Eńbek jáne áleýmettik damý ministri qyzmetin atqardy.
2020 jylǵy saiasi ózgeristerden keiin Kochkorov memlekettik qyzmetten ketip, qoǵamdyq-saiasi ómirden alystady. Sońǵy jyldary ol otbasymen birge AQSh-ta turyp keledi.
Buryn joǵary laýazymdy qyzmetter atqarǵan saiasatkerdiń búginde qarapaiym kýrer bolyp jumys isteýi áleýmettik jelilerde túrli pikir týǵyzdy. Biri ony adal eńbekpen kún kórip júrgeni úshin qurmettese, endi biri burynǵy sheneýniktiń ómirindegi mundai ózgeriske tańdanysyn bildirýde.
