Jambyl oblysynda fitosanitariialyq baqylaý barysynda Qyrǵyzstannan ákelingen alhory men shieden qaýipti karantindik ziiankester anyqtalyp, ónimderdiń el aýmaǵyna kirýine jol berilmedi, dep habarlaidy ult.kz.
Aýyl sharýashylyǵy ministrligi Agroónerkásiptik keshendegi memlekettik inspektsiia komitetiniń Jambyl oblysy boiynsha aýmaqtyq inspektsiiasynyń málimetinshe, tekserý «Qordai» avtomobil ótkizý beketinde júrgizilgen.
Baqylaý kezinde salmaǵy 800 keli jańa pisken alhorydan Komstok symyry anyqtalsa, jalpy salmaǵy 1 450 keli bolatyn shie partiiasynan aziialyq jemis shybyny tabylǵan.
Mamandardyń aitýynsha, bul karantindik ziiankester aýyl sharýashylyǵy úshin eleýli qaýip tóndiredi. Olar taralǵan jaǵdaida jemis aǵashtaryn zaqymdap, elimizdiń baý-baqsha sharýashylyqtaryna aitarlyqtai shyǵyn keltirýi múmkin.
Tekserý qorytyndysy boiynsha zalaldanǵan ónimder qaýipti dep tanylyp, túgeldei keri qaitaryldy. Quqyq buzýshylar ákimshilik jaýapkershilikke tartylyp, olarǵa aiyppul salyndy.
Agroónerkásiptik keshendegi memlekettik inspektsiia komiteti memlekettik shekarada fitosanitariialyq baqylaý kúsheitilgen rejimde jalǵasyp jatqanyn atap ótti. Bul sharalar qaýipti karantindik nysandardyń Qazaqstan aýmaǵyna enýi men taralýynyń aldyn alýǵa baǵyttalǵan.
