Qazaqstanda uiymdasqan qylmystyq toptardyń áreketine qatysty 50-den astam adam qylmystyq jaýapkershilikke tartylyp jatyr. Jedel is-sharalar barysynda zańsyz ainalymnan 10-nan astam atys jáne travmatikalyq qarý men oq-dáriler tárkilengen. Sonymen qatar politseiler azamattarǵa tiesili 77 mln teńgeden astam qarajattyń zańsyz iemdenilýine jol bermedi, dep habarlaidy ult.kz.
Polisia.kz málimetinshe, Ishki ister ministrligi «Zań men tártip» qaǵidatyn iske asyrý aiasynda aýyr qylmystardyń aldyn alyp, qylmystyq toptardyń áreketin toqtatýǵa baǵyttalǵan jedel is-sharalardy kúsheitken.
Qyrkúiek aiynda Astana, Óskemen qalalary men Almaty oblysynda 40 mln teńge talap etti degen kúdikpen jeti adam ustaldy. Olardyń úsheýi buryn sottalǵan. Arasynda adam óltirgeni úshin jazasyn ótegender de bar.
Tintý kezinde kúdiktilerden atys jáne sýyq qarý, oq-dáriler, sondai-aq birneshe qymbat avtokólik tárkilendi.
Osyndai jedel is-sharalar Astana men Shymkent qalalarynda, sondai-aq Aqtóbe, Atyraý, Abai, Aqmola, Shyǵys Qazaqstan, Batys Qazaqstan, Qaraǵandy jáne Mańǵystaý oblystarynda júrgizildi.
Qazir qylmystyq ister boiynsha tergeý amaldary jalǵasyp jatyr. Quqyqqa qaishy áreketterge qatysy bar ózge de adamdardy anyqtap, jaýapqa tartý boiynsha jumystar júrgizilýde.
IIM uiymdasqan qylmysqa qarsy kúres departamentiniń ókili Qýandyq Alpystyń aitýynsha, negizgi maqsat – qylmystyq toptardy der kezinde anyqtap qana qoimai, olardyń jańa qylmys jasaýyna jol bermeý.
«Zań men tártip» qaǵidaty kinálilerdi jaýapqa tartýmen qatar, quqyq buzýshylyqtyń aldyn alýdy jáne azamattardyń qaýipsizdigin qamtamasyz etýdi kózdeidi.
Aita keteiik, biyl elimizde qylmystyń jalpy deńgeii 10 paiyzǵa tómendegen.
