Shyǵys Qazaqstan oblysynda qos azamattyq faktilerin anyqtaý boiynsha júrgizilgen tekserý nátijesinde 6 shetel azamaty Qazaqstan aýmaǵynan shyǵaryldy, dep habarlaidy ult.kz.
ShQO politsiia departamentiniń kóshi-qon qyzmeti jyl basynan beri Qazaqstan Respýblikasynyń azamattyǵyn joǵaltqan 450-den astam adamnyń deregin tirkegen. Olardyń basym bóligi basqa memlekettiń azamattyǵyn alǵan.
Zań talaptaryn buzǵany úshin 31 adam ákimshilik jaýapkershilikke tartylǵan. Onyń ishinde 24 azamat shetel azamattyǵyn alǵany týraly belgilengen merzimde habarlamaǵan, al 7 adam Qazaqstan azamattyǵyn joǵaltqannan keiin el qujattaryn zańsyz paidalanǵan.
Sot sheshimimen 6 sheteldik azamat Qazaqstan aýmaǵynan shyǵaryldy.
Anyqtalǵan jaǵdailardyń biri Óskemen qalasynyń 43 jastaǵy turǵynyna qatysty bolǵan. Ol 2024 jyldyń qazan aiynda ózge memlekettiń azamattyǵyn alǵanymen, bul týraly ishki ister organdaryna ýaqytynda habarlamaǵan. Sonyń saldarynan onyń Qazaqstan Respýblikasy azamattyǵyn joǵaltqany tirkelip, el qujattary tárkilengen.
Politsiia shetel azamattyǵyn alǵan Qazaqstan azamattary bul týraly 30 kún ishinde ishki ister organdaryna habarlap, Qazaqstan Respýblikasynyń azamattyǵyn rastaityn qujattaryn tapsyrýǵa mindetti ekenin eske salady.
Talaptardy oryndamaǵan azamattarǵa zańnamaǵa sáikes ákimshilik jaýapkershilik qarastyrylǵan.
