Qazaqstan Respýblikasynyń Quryltaiynda onlain-platformalar men mass-media máselelerine qatysty zań jobalary birinshi oqylymda qaraldy. Olardyń negizgi erejelerin Mádeniet jáne aqparat ministri Arman Qyryqbaev tanystyrdy, dep habarlaidy ult.kz QR Mádeniet jáne aqparat ministrliginiń baspasóz qyzmetine silteme jasap.
Ministrdiń aitýynsha, media keńistiktegi jańa syn-qaterler zańnamany jetildirýdi qajet etedi. Usynylǵan túzetýler onlain-platformalardyń jaýapkershiligin arttyrýǵa, balalardyń internettegi qaýipsizdigin qamtamasyz etýge jáne azamattardyń quqyqtaryn qorǵaýǵa baǵyttalǵan.
Zań jobalarynda onlain-platformalardyń Qazaqstanda zańdy tulǵa retinde ókildik ashýy týraly talapty bekitý usynylady. Quqyqqa qaishy kontentti, sonyń ishinde balalarǵa qatysty kiberbýlling dep tanylǵan aqparatty joiý jónindegi nusqamany oryndamaǵany úshin ákimshilik jaýaptylyq kózdelgen. 2026 jyldyń alǵashqy on aiyndaǵy monitoring barysynda quqyqqa qaishy 128,5 myń material anyqtalyp, olardyń shamamen 70 paiyzy joiylǵan.
Sondai-aq paidalanýshylardy jáne bes myńnan astam jazylýshysy bar ashyq qaýymdastyqtardy sáikestendirý tetikterin engizý usynylady.
Balalardy qorǵaýǵa erekshe kóńil bólingen. Zań jobalary 16 jasqa tolmaǵan balalardyń onlain-platformalarǵa tirkelýine tyiym salýdy jáne platformalardy paidalanýshylardyń jasyn tekserýge mindetteýdi kózdeidi. Bul shekteý balalardyń ata-anasymen, jaqyndarymen jáne muǵalimderimen bailanysýyna arnalǵan messendjerlerge qoldanylmaidy.
Aýdiovizýaldyq qyzmetter salasynda tele- jáne radioarnalardy tiisti platformalar arqyly taratýdy litsenziialaý, sondai-aq onlain-kinoteatrlardy Qazaqstandaǵy zańdy ókilin belgileýge mindetteý usynylady.
Azamattardyń ar-namysyn, qadir-qasietin jáne iskerlik bedelin qorǵaý úshin nuqsan keltiretin málimet qai jerde jariialansa, ony sol derekkózde, onyń ishinde áleýmettik jelide teriske shyǵarý kózdelgen. Buǵan qosa, onlain-platformalarda jala japqany, al mass-media men platformalarda bylapyt sóz qoldanǵany úshin ákimshilik jaýaptylyq engizý jáne adamnyń beinesin kelisiminsiz paidalaný sharttaryn naqtylaý usynylady.
Túzetýlerde memlekettik organdardyń resmi jaýaptaryn buqaralyq aqparat quraldarynda jariialaǵanda arnaiy belgileý, sondai-aq bilim berý kýrstary men okkýlttik qyzmetter týraly aqparattyń ashyqtyǵyn arttyrý qarastyrylǵan.
Usynylǵan normalar memleket pen onlain-platformalar arasyndaǵy ózara is-qimyldy jaqsartyp, aqparat keńistiginde azamattardyń quqyqtaryn qorǵaý kepildikterin kúsheitýge baǵyttalǵan. Zań jobalaryn iske asyrý respýblikalyq biýdjetten qosymsha shyǵyndy talap etpeidi.