Soltústik Qazaqstan oblysynda 2025 jyldan beri memlekettik qyzmetshilerdiń qumar oiyndar men bás tigýge qatysýyna qatysty 9 derek anyqtalǵan. Zań talaptaryn buzǵan memlekettik qyzmetshilerdiń barlyǵy qyzmetinen bosatylǵan, dep habarlaidy ult.kz.
Bul týraly Memlekettik qyzmet isteri agenttiginiń Soltústik Qazaqstan oblysy boiynsha departamenti málimdedi.
Departamenttiń málimetinshe, byltyr memlekettik qyzmetshiler arasynda qumar oiyndar men bás tigýge qatysty 6 derek tirkelgen. Onyń úsheýi — Aqjar aýdanynda, ekeýi — Taiynsha aýdanynda, bireýi Esil aýdanynda anyqtalǵan. Al biyl Petropavl qalasynda taǵy 3 derek belgili bolǵan.
Departamenttiń bas mamany Evgenii Iakovenkonyń aitýynsha, memlekettik qyzmetshilerdiń qumar oiyndarǵa qatysýy tek jeke másele emes, memlekettik organnyń bedeline de áser etedi.
«Qumar oiyndar men bás tigý qarjylyq táýekeldermen bailanysty. Olarǵa shamadan tys áýestený táýeldilikke, qarjylyq qiyndyqtarǵa, otbasylyq jáne áleýmettik qatynastardyń nasharlaýyna ákelýi múmkin. Ásirese memlekettik qyzmetshi úshin onyń salmaǵy áldeqaida aýyr. Sebebi onyń árbir áreketi jeke basynyń bedeline ǵana emes, memlekettik organǵa degen qoǵamnyń senimine de áser etedi», — deidi Evgenii Iakovenko.
Qoldanystaǵy zańnamaǵa sáikes, memlekettik qyzmetshilerge qumar oiyndar men bás tigýge qatysýǵa shekteý qoiylǵan. «Qazaqstan Respýblikasynyń memlekettik qyzmeti týraly» zań boiynsha qyzmetshi laýazymǵa kirisken kúnnen bastap kúntizbelik 30 kún ishinde «eGov mobile» qosymshasy arqyly qumar oiyndarǵa jáne (nemese) bás tigýge qatysýyna shekteý qoiýǵa mindetti.
Memlekettik qyzmet isteri agenttiginiń SQO boiynsha departamenti mundai zań buzýshylyqtardy anyqtaý jáne tiisti sharalar qabyldaý baǵytyndaǵy jumysty turaqty túrde júrgizip keledi.
Mamandardyń aitýynsha, memlekettik qyzmetshi úshin qyzmettik tártip pen kásibi ádep normalaryn saqtaý — mindetti talap.
