Oqiǵa jeli qoldanýshylarynyń biri Móldir Áýelbekovaǵa «Molia, ustazyńyzben dostasyńyz» dep pikir qaldyrǵannan keiin bastalǵan. Ánshi bul pikirge «Qudai saqtasyn, betin aýlaq» dep jaýap bergen, dep habarlaidy ult.kz.
Osydan keiin Baǵym Muhitdenova áleýmettik jelidegi paraqshasynda únsiz júrgeniniń sebebin túsindirip, ánshiniń sózine renish bildirdi.
Prodiýser Móldir Áýelbekovanyń búginde tanymal bolýyna óziniń de eńbegi sińgenin aityp, ótkendi umytpaýǵa shaqyrdy.
«Qudaiǵa shúkirshilik aityp otyryp, sol Qudaidyń “jaqsylyq jasaǵan adamǵa alǵys ait” degen amanatynyń ornyna “bálesinen aýlaq” deýiń durys pa? Qazaq sahnasyna esik ashyp bergenimdi umytyp, “bárine óz kúshimmen jettim” deýiń durys pa?» – dep jazdy ol.
Baǵym Muhitdenova buǵan qosa ánshimen aradaǵy burynǵy qarym-qatynasyna qatysty aýyr ókpe-renishin de ashyq jetkizdi. Onyń sózinshe, Móldir Áýelbekova bir kezderi onyń úiinde turǵan, alaida keiin prodiýserge satqyndyq jasaǵan.
«Adal asymdy iship, shańyraǵymda turyp, betime kúlip, artymnan satqyndyq jasaǵanyń durys pa? Kúieýimniń nazaryn ǵana emes, ulym ekeýmizge tiesili qarajatyn alyp qoiǵanyń durys pa?» – dedi prodiýser.
Sonymen qatar ol Móldir Áýelbekovanyń ózin áleýmettik jelide qurban retinde kórsetýine qarsylyq bildirdi.
«Jyldar boiy óz jaramdy ózim tańyp, úndemei, ishtei jylap qana kelemin. Meniń kúiimdi bile tura, ózińdi qurban qyp kórsetýiń durys pa? Táýbá men tárbieni tilge tiek etseń, endigisi biz jaqqa qarap sóileme. Sonda men de jumǵan aýzymdy ashpaimyn», – dep jazdy Baǵym Muhitdenova.
Aita keteiik, Móldir Áýelbekovanyń jańa obrazy jelide qyzý talqylandy.
Baǵym Muhitdenova kim?
Baǵym Muhitdenova – qazaqstandyq ánshi, kompozitor ári mýzykalyq prodiýser. Ol otandyq shoý-bizneste 30 jyldan astam ýaqyt eńbek etip, birqatar tanymal ánshiler men mýzykalyq jobalardyń qalyptasýyna atsalysqan.
Baǵym Muhitdenovanyń esimi «KeshYou» tobymen tyǵyz bailanysty. Ol toptyń mýzykalyq baǵytyn qalyptastyrýǵa, án tańdaýǵa jáne oryndaýshylardyń shyǵarmashylyq daiyndyǵyna qatysqan. Top quramynda keiin jeke shyǵarmashylyq jolyn bastaǵan Janar Duǵalova, Kámshat Joldybaeva, Móldir Áýelbekova sekildi ánshiler boldy.
Móldir Áýelbekova da «KeshYou» quramynda birneshe jyl óner kórsetti. Keiin ánshi toptan ketip, jeke shyǵarmashylyǵyn jalǵastyrdy. Osy kezeńde onyń Baǵym Muhitdenovamen qarym-qatynasy kúrdelenip, eki tarap arasynda túsinispeýshilik paida bolǵan. Bul másele birneshe jyldan beri shoý-biznes ókilderi men kórermender arasynda talqylanyp keledi.
Baǵym Muhitdenova 2017 jyly Móldir Áýelbekovamen bailanysyn úzgenin ashyq aitqan. Alaida 2025 jyly bergen suhbatynda prodiýser burynǵy renishiniń basylǵanyn aityp, qazir Móldirmen sóilesip turatynyn jetkizgen. Onyń sózinshe, ánshiniń sol kezdegi suhbattarynda aitqan keibir pikirleri ózine aýyr tigen.
Baǵym Muhitdenovanyń ózi de sahnada óner kórsetedi. 2025 jyly ol 30 jyldan keiin alǵash ret jeke án keshin ótkizgen. Prodiýser sol jyldar ishinde ónerden gonorar almaǵanyn, án aitýdy eń aldymen óz qalaýy dep sanaitynyn aitqan.
Baǵym Muhitdenova – prodiýser Baian Alagózovanyń týǵan ápkesi. Ekeýi de otandyq shoý-biznes salasynda uzaq jyldar boiy eńbek etip keledi.
Móldir Áýelbekova týraly ne belgili?
Móldir Áýelbekova – qazaqstandyq tanymal ánshi, aktrisa jáne telejúrgizýshi. Ol 1986 jyly 10 tamyzda Taraz qalasynda dúniege kelgen. Ónerge bala kezinen qyzyǵyp, mýzyka salasynda bilim alǵan. Keiin Temirbek Júrgenov atyndaǵy Qazaq ulttyq óner akademiiasynda bilimin jalǵastyryp, estrada óneri boiynsha magistr dárejesin alǵan.
Ánshiniń kópshilikke keńinen tanylýyna «SuperStar KZ» jobasyna qatysýy áser etti. 2004 jyly baiqaýdyń ekinshi maýsymynda óner kórsetip, úzdik ondyqqa deiin jetti. Osydan keiin onyń kásibi sahnadaǵy joly bastaldy.
Móldir Áýelbekova «KeshYou» qyzdar tobynyń alǵashqy quramdarynyń birinde óner kórsetti. Topta júrgen kezinde birneshe tanymal án oryndap, qazaq estradasyndaǵy tanymal ánshilerdiń birine ainaldy. Keiin jeke shyǵarmashylyǵyn bastap, jeke ánderin jaryqqa shyǵardy.
Ánshiniń kino salasynda da tájiribesi bar. Ol «Ǵashyq júrek nemese juldyzdy kokteil» filminde basty rólderdiń birin somdady. Filmniń 2011 jyly jaryq kórgen ekinshi bóliminde de Móldir Áýelbekova oinady.
Móldir Áýelbekova telejúrgizýshi retinde de eńbek etken. Ol «Elim meniń» baǵdarlamasyn júrgizip, kórermenge tanymal boldy. Sonymen qatar keiin mýzykalyq prodiýserlikpen ainalysyp, «Nazar» qyzdar tobynyń prodiýseri boldy.
Ónerdegi jolynda Móldir Áýelbekova respýblikalyq jáne halyqaralyq baiqaýlarǵa qatysyp, túrli marapattarǵa ie boldy. 2018 jyly oǵan «Qurmet» ordeni berilgen.
2026 jyly ánshi ónerdegi 22 jyldyǵyna orai Qazaqstan qalalaryn qamtityn kontserttik týryn bastaýdy josparlaǵanyn málimdedi. Ol araǵa segiz jyl salyp úlken kontserttik baǵdarlamamen kórermendermen qaita kezdesýge daiyndalyp jatqanyn aitqan.
Qazir Móldir Áýelbekova jeke ánshi retinde shyǵarmashylyǵyn jalǵastyryp keledi. 2026 jylǵy suhbatynda ol Baian Maqsatqyzy Esentaevany ustazy dep ataitynyn, biraq prodiýserlik ortalyqqa qaita oralý jospary joq ekenin aitqan.
