Qostanai oblysynyń Qarabalyq aýdanynda qonys aýdarýshylardyń turǵyn úi satyp alý kezinde zańǵa qaishy áreketter jasaǵany anyqtaldy, dep habarlaidy ult.kz.
Bas prokýratýra habarlaýynsha, qoldanystaǵy zańnamaǵa sáikes, qonys aýdarýshylarǵa kelý óńirinde turǵyn úi satyp alý úshin 1 625 ailyq eseptik kórsetkish mólsherinde ekonomikalyq mobildilik sertifikaty beriledi. Alaida keibir azamattar bul memlekettik qoldaý tetigin zańsyz maqsatta paidalanǵan.
Máselen, 2024 jyly bir qonys aýdarýshy jalǵan satyp alý-satý shartyn jasap, 6 million teńgege páter rásimdegen. Onyń 3 million teńgesi biýdjet qarajatynan ótelýi tiis bolǵan. Tergeý barysynda satýshynyń qolyna naqty 1,6 million teńge tigeni, al páter quny satyp alýshynyń ótinishimen ádeii kóterilgeni anyqtaldy.
Sondai-aq taǵy bir jaǵdaida qonys aýdarýshy sertifikat arqyly 2,67 million teńge alyp, quny 5,5 million teńgege jasandy túrde kóterilgen páter satyp alǵan.
Alaiaqtyq derekteri boiynsha Qarabalyq aýdandyq prokýratýrasy eki qylmystyq is qozǵady. Tergeý barysynda kúdiktiler kinásin moiyndap, memleketke keltirilgen 5,7 million teńge shyǵyn tolyq ótelgen. Osyǵan bailanysty ister aqtalmaityn negizder boiynsha toqtatylǵan.
