Qazaqstan musylmandary dini basqarmasy (QMDB) chaildfri ideologiiasyna qatysty pátýa jariialap, onyń islam shariǵatyna qaishy ekenin málimdedi., dep habarlaidy ult.kz.
Pátýa mátininde chaildfri (aǵylsh. childfree – «balasyz ómir») sanaly túrde balaly bolýdan bas tartýdy nasihattaityn sýbmádeniet retinde sipattalǵan. Qujatta bul kózqarasty ustanatyn adamdardyń balalardy jek kórmeitini, alaida kóbine bala tárbiesine jumsalatyn shyǵyndardan qashý, qosymsha jaýapkershilikti moinyna almaý, jeke erkindik pen kásibi damýdy aldyńǵy orynǵa qoiý siiaqty sebepterdi alǵa tartatyny aitylǵan.
QMDB-nyń málimetinshe, sanaly túrde balaly bolýdan bas tartý adam tabiǵatyna (fitrasyna) qaishy keledi. Pátýada úilený jáne urpaq súiý adamnyń tabiǵi bolmysynyń bir bóligi ekeni kórsetilgen.
Sondai-aq qujatta neke qiiýdyń Paiǵambar Muhammedtiń (s.ǵ.s.) súnneti ekeni jáne onyń negizgi maqsattarynyń biri adamzat teginiń saqtalýy men urpaqtyń jalǵasýy ekeni atap ótilgen.
Pátýada islamda balaly bolý erli-zaiyptylarǵa ortaq quqyq sanalatyny aitylǵan. Eger jubailardyń biri bala súiýdi qalasa, ekinshi tarap oǵan tyiym sala almaidy. Al júktilikti ýaqytsha keiinge qaldyrý tek densaýlyqty qalpyna keltirý nemese bala tárbiesine daiyndalý siiaqty oryndy sebepter bolǵan jaǵdaida jáne erli-zaiyptylardyń ózara kelisimimen ǵana ruqsat etiledi.
Basqarma málimetinshe, jaýapkershilikten qashý nemese kedeilikten qorqyp júktilikten ádeii bas tartý shariǵatta quptalmaidy. Sonymen birge urpaqsyzdyqqa ákeletin, júktilikti birjolata boldyrmaityn tásilderge tyiym salynatyny kórsetilgen.
QMDB jariialaǵan sheshimge sáikes, chaildfri ideologiiasy islam shariǵatyna, adam tabiǵatyna jáne neke maqsatyna qaishy dep tanyldy. Sondai-aq júktilikti boldyrmaý nemese keiinge qaldyrý tek májbúrli jáne shariǵat talaptaryna qaishy kelmeitin jaǵdailarda ǵana ruqsat etiletini, al júktilikti birjolata boldyrmaityn tásilderge tyiym salynatyny aityldy.
