Prezident Qasym-Jomart Toqaev Qarjylyq monitoring agenttiginiń tóraǵasy Janat Elimanovty qabyldap, vedomstvonyń 2026 jyldyń alǵashqy jartyjyldyǵyndaǵy jumysynyń qorytyndylary týraly esebin tyńdady, dep habarlaidy ult.kz.
Janat Elimanovtyń aitýynsha, esepti kezeńde 496 qylmystyq is boiynsha tergeý aiaqtalyp, jábirlenýshilerge 22,6 mlrd teńge kólemindegi zalal ótelgen.
Sonymen qatar Agenttik 7 uiymdasqan qylmystyq toptyń, onyń ishinde 4 transulttyq toptyń qyzmetine tosqaýyl qoiǵan. Sondai-aq 176 mlrd teńgeden astam qarajatty zańsyz qolma-qol aqshaǵa ainaldyrǵan 44 jeli anyqtalyp, olardyń jumysy toqtatylǵan.
QMA málimetinshe, esirtki biznesi men internet-alaiaqtyqtan túsken qarajatty zańdastyrý úshin paidalanylǵan 12 astyrtyn kriptoaiyrbastaý pýnkti joiylǵan. Budan bólek, óz esepshottary arqyly 113 mlrd teńgeni ótkizgen 36 dropperlik top áshkerelendi.
Agenttik TMD elderi aýmaǵynda alǵash ret uialy bailanys operatorlarynyń jumysyn qoldan jasap, azamattardyń jeke derekterin urlaýǵa jáne jappai fishingtik SMS-habarlamalar taratýǵa arnalǵan arnaiy qurylǵyny paidalanǵan kúdiktilerdiń ustalǵanyn habarlady.
Biýdjet qarajatyn baqylaý barysynda 52 infraqurylymdyq joba boiynsha 279 mlrd teńgeniń negizsiz jumsalýyna jol berilmegen. Sondai-aq ǵylymi ázirlemelerdi kommertsiialandyrý kezinde 10 mlrd teńge kólemindegi biýdjet qarajatyn jymqyrý qaýpi anyqtalǵan.
Sonymen qatar Qarjylyq monitoring agenttigi jeke klinikalardyń 140 myń azamatty jalǵan tirkeý arqyly Mindetti áleýmettik meditsinalyq saqtandyrý qorynan zańsyz qarajat alýǵa árekettengenin anyqtady.
Aldyn alý sharalary aiasynda 9 myń zańsyz oiyn saity men akkaýnty, alaiaqtyq maqsatta ashylǵan 2,3 myń internet-resýrs jáne 35 myńnan astam qatysýshysy bar 25 chattyń qyzmeti toqtatylǵan.
Kezdesý sońynda Memleket basshysy Qarjylyq monitoring agenttiginiń qyzmetiniń negizgi baǵyttary boiynsha birqatar naqty tapsyrma berdi.
