Qarjylyq monitoring agenttigi «CVK» ataýymen jumys istegen qarjy piramidasynyń qyzmetin toqtatty. Qazirgi ýaqytta Agenttiktiń aýmaqtyq departamentteri elimizdiń 14 óńirinde sotqa deiingi tergep-tekserý jumystaryn júrgizip jatyr, dep habarlaidy ult.kz.
Tergeý málimetinshe, joba ózin marketpleis retinde tanystyryp, azamattarǵa turaqty tabys ákeletin túrli investitsiialyq «dúken» paketterin satyp alýdy usynǵan. Alaida júiede kórsetilgen saýda operatsiialary naqty bolmaǵan.
Qatysýshylardyń jeke kabinetterinde shyn máninde satylmaǵan taýarlarǵa qatysty oryndalǵan tapsyrystar men jetkizilimder kórsetilip, sol úshin virtýaldy syiaqylar eseptelgen. Sonymen qatar jobanyń negizgi tetigi jańa salymshylardy tartýǵa qurylǵan. Uiymdastyrýshylar referaldyq júie arqyly jańa qatysýshylar ákelgenderge aqshalai bonýs pen baǵaly syilyqtar ýáde etken.
QMA málimetinshe, agressivti jarnama men óńirlerdegi belsendi nasihat jumystarynyń nátijesinde zańsyz shemaǵa shamamen 1,5 myń adam tartylǵan. Jobany nasihattaý úshin jabyq kezdesýler, keńselerdiń saltanatty ashylýy jáne jappai tanystyrylymdar uiymdastyrylyp, olardyń materialdary áleýmettik jelilerde keńinen taratylǵan.
Tergeý barysynda qarjy aǵyndarynyń kriptovaliýtalyq platformalar arqyly shyǵarylyp, keiin banktik shottarǵa aýdarylǵany anyqtalǵan. Agenttiktiń jedel sharalary nátijesinde 474 myń USDT kólemindegi kriptoaktivterge tyiym salyndy.
Qazirgi ýaqytta sotqa deiingi tergep-tekserý jalǵasyp jatyr. Qylmystyq-protsestik kodekstiń 201-babyna sáikes ózge aqparat jariia etilmeidi.
Qarjylyq monitoring agenttigi «CVK» jobasynyń qyzmetinen zardap shekken azamattardy turǵylyqty jeri boiynsha vedomstvonyń aýmaqtyq departamentterine júginýge shaqyrdy.
