Kúzge qarai Jambyl oblysyndaǵy QazVac vaktsinasyn shyǵaratyn zaýyt iske qosylady. Bul týraly QR Densaýlyq saqtaý ministri Aleksei Tsoi aitty, dep habarlaidy "Ult aqparat".
«Shynymen de qazaqstandyq vaktsina elimizde de, shetelde de úlken suranysqa ie bolyp otyr. Árine, QazVac vaktsinasynyń tanymaldyǵyn arttyrý jáne ony ózge elderge jetkizý jumystaryn júrgizý josparlanǵan. Protsedýra uzaqqa sozylady. Elderdiń vaktsinany ózara moiyndaýy, jetkiziletin elde tirkelýi qajet. Bul jumystardy birtindep bastaimyz. Qazir bul vaktsinany alýǵa niet tanytqan seriktesterdi izdestirip jatyrmyz. Barlyq retteýshi quraldar iske qosylǵan», - dedi ministr Ortalyq kommýnikatsiialar qyzmetindegi brifing barysynda.
Onyń atap ótýinshe, Jambyl oblysyndaǵy QazVac vaktsinasyn shyǵaratyn zaýyttyń qurylysy aiaqtalýǵa jaqyn. Zaýyt iske qosylǵannan keiin ishki jáne syrtqy naryqty qajetti vaktsinamen qamtamasyz etýge qaýqarly bolady.
«Zaýytty iske qosý jáne jóndeý jumystary aiaqtaldy. Qural-jabdyqtardy tekserý jumystary júrgizilip jatyr. Jambyl oblysy ákimdiginiń aqparatyna sáikes, reglamentke bailanysty protsedýralar júrgizilý ústinde. Kúzge qarai bul zaýyt iske qosylyp, óndiristik qýatyn birtindep arttyrýy tiis», - dedi Aleksei Tsoi.
