«Qazgidromet» RMK 2026 jylǵa arnalǵan kúzdik bidaidyń ónimdiligi boiynsha naqtylanǵan boljamyn jariialady. Eseptik derekterge sáikes, qalyptasqan agrometeorologiialyq jaǵdailar men aldaǵy kezeńge arnalǵan aýa raiy boljamyn eskere otyryp, elimizdiń ońtústik óńirlerinde kúzdik bidai ónimdiligi negizinen kópjyldyq ortasha kórsetkishter deńgeiinde bolady dep kútilýde, dep habarlaidy ult.kz.
Mamandardyń málimetinshe, Almaty oblysynda kúzdik bidai ónimdiligi Ile aýdanynda 10,5–12,5 tsentner/gektar bolsa, Eńbekshiqazaq aýdanynda 22,8–24,8 tsentner/gektarǵa deiin jetýi múmkin.
Jambyl oblysynda ónimdilik kórsetkishteri Talas jáne Sarysý aýdandarynda 11,2–13,3 tsentner/gektar kóleminde boljansa, Shý aýdanynda 15,8–17,8 tsentner/gektar deńgeiinde bolady dep kútilýde.
Jetisý oblysynda eń tómengi ónimdilik Kerbulaq aýdanynda 15,8–17,8 tsentner/gektar shamasynda bolsa, Taldyqorǵan qalasynda 21,3–23,3 tsentner/gektarǵa deiin jetedi degen boljam jasalǵan.
Al Túrkistan oblysynda Qazyǵurt aýdany erekshe nátije kórsetedi dep kútilýde. Bul óńirde kúzdik bidai ónimdiligi kópjyldyq normadan joǵary bolyp, 21,7–23,7 tsentner/gektar deńgeiinde qalyptasýy múmkin. Oblystyń ózge aýmaqtarynda ónimdilik ortasha kópjyldyq mánder sheginde bolady. Atap aitqanda, Saryaǵash jáne Arys aýdandarynda 11,7–13,8 tsentner/gektar bolsa, Maqtaaral aýdanynda 29,8–30,8 tsentner/gektarǵa deiin jetedi dep boljanýda.
«Qazgidromet» málimetinshe, ońtústik óńirler aýdandary boiynsha tolyq ónimdilik boljamymen mekemeniń resmi saitynda jáne fermerlerge arnalǵan AgroData qosymshasynda tanysýǵa bolady.
