CS2 oiyny boiynsha magic komandasynyń mergeni, qazaqstandyq kibersportshy Ábdirahim mo0N Isa lýdomaniiamen kúresken kezeńi týraly ashyq áńgimeledi, dep habarlaidy ult.kz.
Tengri Sport-qa bergen suhbatynda ol jasóspirim shaǵynda bás tigýge táýeldi bolyp, sonyń saldarynan qomaqty qaryzǵa batqanyn aitty.
Kibersportshynyń sózinshe, eń aýyr kezeń 15 pen 18 jas aralyǵynda bolǵan. Sol ýaqytta jinalǵan qaryzdar oǵan psihologiialyq turǵydan qatty áser etken.
– 15 pen 18 jas aralyǵynda úlken qiyndyqtarǵa tap boldym. Bul bás tigýmen bailanysty edi, – dedi ol.
Ábdirahim keiin kásibi mansabyndaǵy alǵashqy mańyzdy qadamdardyń biri bolǵan RUBY uiymymen kelisimshart jasasar aldynda barlyq máselesin ashyq aitqanyn jetkizdi. Onyń aitýynsha, uiym iesi qaryzdarynyń basym bóligin óteýge kómektesken.
– Men jaǵdaiymdy jasyrmai aittym. Ol birden qoldaý kórsetti. Keiin oinai bastadym, qaryzdarymdy birtindep jaýyp, bul qiyndyqtan tolyq shyqtym, – dedi oiynshy.
Qazir kibersportshy bul kezeńniń artta qalǵanyn aitady. Onyń sózinshe, keiin bar nazaryn oiynǵa aýdaryp, kásibi damýǵa kúsh salǵan.
Ábdirahim RUBY komandasyna 2024 jyldyń qańtarynda qosylǵan. Bul onyń jalaqy tólenetin alǵashqy kásibi kelisimsharty bolǵan. Ol halyqaralyq stýdenttik CS týrnirinde sátti óner kórsetkennen keiin uiymnyń nazaryna ilikken.
Biyl PGL Astana týrniri onyń mansabyndaǵy alǵashqy iri halyqaralyq jarysqa ainaldy. Qazaqstandyq oiynshy óner kórsetetin magic komandasy jarystyń jartylai finalyna deiin jetip, keiin úshinshi oryn úshin ótken kezdesýde MOUZ klýbyna ese jiberdi.
Týrnir qorytyndysy boiynsha komanda tórtinshi oryn alyp, 56 myń dollar syiaqyǵa ie boldy. Bul Ábdirahimniń kásibi mansabyndaǵy eń iri qarjylai tabystarynyń biri sanalady.
