Týrizmniń el ekonomikasyna qosqan úlesi 5 trln teńge deńgeiine jetti. Búgingi tańda bul salada 600 myńnan astam adam jumys isteidi. Bul týraly Úkimet otyrysynda týrizm jáne sport ministri Erbol Myrzabosynov málimdedi, dep habarlaidy ult.kz.
Onyń aitýynsha, elimizge kelgen sheteldik týristerdiń shyǵyndary $2,9 mlrd quraǵan. Bul rette týristik salaǵa tartylǵan investitsiialar kólemi ótken jylmen salystyrǵanda 33%-ǵa ósip, 1,3 trln teńgege jetken. Al salyq túsimderiniń kólemi 18%-ǵa ulǵaiyp, 630 mlrd teńgeni qurady.
«Salany odan ári damytý maqsatynda osy jyldyń naýryz aiynda zańnamalyq túzetýler qabyldandy. Atap aitqanda, týristik avtobýstar úshin "jasyl dáliz" tetigi engizilýde. Bul uiymdastyrylǵan týristik toptardyń memlekettik shekaradan ótý ýaqytyn edáýir qysqartýǵa múmkindik beredi. Vizit-ortalyq uǵymy bekitilip, olardyń qurylýy men jumys isteýine qoiylatyn negizgi talaptar aiqyndaldy. Týristik qyzmetterdiń sapasyn arttyrý maqsatynda gidterdiń, ekskýrsovodtardyń jáne týrizm nusqaýshylarynyń qyzmetin júzege asyrý qaǵidalary bekitiletin bolady», — dep atap ótti Erbol Myrzabosynov.
Jańartylǵan zańnama aiasynda balalardyń men ekologiialyq demalysqa erekshe kóńil bólingen. 18 jasqa deiingi balalar úshin ulttyq saiabaqtarǵa kirý tegin. Bul shara ishki týrizmniń qoljetimdiligin arttyrýǵa, sondai-aq kanikýl kezeńinde óskeleń urpaqtyń bos ýaqytyn tiimdi uiymdastyrýǵa múmkindik beredi.
