2026 jylǵy 30 mamyr men 1 maýsym aralyǵynda Qazaqstannyń birneshe óńirinde aýa raiy qubylmaly bolady, dep habarlaidy ult.kz.
Sinoptikterdiń boljaýynsha, atmosferalyq frontaldy bólikterdiń ótýine bailanysty eldiń soltústiginde, batysynda jáne ońtústiginde jańbyr jaýyp, naizaǵai oinaidy.
Ásirese 30-31 mamyr kúnderi Batys Qazaqstan, Atyraý, Mańǵystaý, Aqtóbe jáne Qostanai oblystarynda aýa raiynyń qolaisyz qubylystary kútiledi. Atalǵan óńirlerde qatty jańbyr jaýyp, kei jerlerde burshaq túsip, jeldiń ekpini kúsheiýi múmkin.
Respýblikanyń qalǵan aýmaǵynda jaýyn-shashynsyz aýa raiy basym bolady. Degenmen el boiynsha jeldiń kúsheiýi boljanyp otyr. Al ońtústik óńirlerde shańdy daýyldyń bolýy yqtimal.
Aldaǵy kúnderi aýa temperatýrasy da joǵary deńgeide saqtalady. Kúndiz batys óńirlerde aýa temperatýrasy +20…+25 gradýsqa deiin kóterilse, soltústik, shyǵys jáne ortalyq aimaqtarda +23…+38 gradýsqa deiin jylynady. Ońtústik óńirlerde aptap ystyq saqtalyp, synap baǵany +30…+40 gradýsqa deiin jetedi.
Mamandar turǵyndarǵa aýa raiynyń ózgerýine bailanysty qaýipsizdik sharalaryn saqtap, daýyldy eskertýlerdi qadaǵalap otyrýǵa keńes beredi.
