«Qazgidromet» RMK 30 shildege arnalǵan daýyldy eskertý jariialap, elimizdiń birqatar óńirinde qatty ystyq, naizaǵai, burshaq, shańdy daýyl men qatty jel kútiletinin habarlady, dep habarlaidy ult.kz.
Sinoptikterdiń málimetinshe, Batys Qazaqstan jáne Atyraý oblystarynda 30 shildede, al Mańǵystaý oblysynda 30 shilde men 1 tamyz aralyǵynda qatty jáne óte qatty ystyq saqtalady. Qostanai, Aqtóbe jáne Ulytaý oblystarynda 30-31 shilde kúnderi aptap ystyq bolady.
Soltústik Qazaqstan men Aqmola oblystarynda 30 shilde men 1 tamyz aralyǵynda, al Qyzylorda jáne Túrkistan oblystarynda 30 shilde men 2 tamyz aralyǵynda qatty ystyq kútiledi. Osyǵan bailanysty atalǵan óńirlerdiń basym bóliginde joǵary jáne tótenshe órt qaýpi saqtalady.
Eń joǵary temperatýra Qyzylorda jáne Túrkistan oblystarynda tirkelýi múmkin. Qyzylorda oblysynda aýa temperatýrasy 40-44 gradýsqa deiin kóterilip, oblystyń ortalyǵy men shyǵysynda shańdy daýyl soǵyp, jeldiń ekpini sekýndyna 15-20 metrge deiin jetedi. Túrkistan oblysynda da kúndiz 40-42 gradýs ystyq bolyp, kei aýdandarda shańdy daýyl men jeldiń kúsheiýi boljanyp otyr.
Astanada kúndiz aýa temperatýrasy 35 gradýsqa deiin kóterilse, Almaty qalasynda tótenshe órt qaýpi saqtalady. Shymkentte kúndiz 40 gradýsqa deiin ystyq bolyp, soltústik-shyǵystan soǵatyn jeldiń ekpini 15-20 m/s-qa jetedi.
Sonymen qatar eldiń shyǵys jáne soltústik óńirlerinde aýa raiynyń qubylmaly bolýy kútiledi. Shyǵys Qazaqstan, Abai, Soltústik Qazaqstan, Qostanai, Pavlodar, Aqtóbe, Batys Qazaqstan, Mańǵystaý jáne Jetisý oblystarynyń jekelegen aýdandarynda jańbyr jaýyp, naizaǵai oinaidy. Kei jerlerde burshaq túsip, daýyl soǵyp, jeldiń ekpini 15-20 m/s, kei óńirlerde 23-28 m/s-qa deiin kúsheiýi múmkin.
Aqmola oblysynda kúndiz 35-38 gradýs ystyq kútilse, Qaraǵandy, Pavlodar jáne Almaty oblystarynda synap baǵany 35-36 gradýsqa deiin kóteriledi. Jetisý oblysynda 35-38 gradýs aptap ystyq saqtalady.
Sinoptikter óńirlerdiń basym bóliginde joǵary jáne tótenshe órt qaýpi saqtalatynyn eskertip, turǵyndardy qaýipsizdik sharalaryn saqtaýǵa shaqyrdy. Mamandar kúnniń eń ystyq ýaqytynda uzaq ýaqyt dalada bolmaýǵa, órt qaýipsizdigi talaptaryn qatań saqtaýǵa jáne aýa raiy boljamyn qadaǵalap otyrýǵa keńes beredi.
