Premer-ministr Oljas Bektenov Qazaqstanǵa avtokólikterdi zańsyz ákelý derekteri áli de tirkelip jatqanyn málimdep, bul máselege qatysty shuǵyl sharalar qabyldaýdy tapsyrdy, dep habarlaidy ult.kz.
Úkimet otyrysynda sóilegen Úkimet basshysy el aýmaǵyna zańsyz jetkiziletin kólikterdiń basym bóligi tehnikalyq jáne ekologiialyq talaptarǵa sáikes kelmeitinin aitty.
– Mundai kólikterdiń basym bóligi tehnikalyq jáne ekologiialyq talaptarǵa sai kelmeidi. Bul, sonyń ishinde, keden zańnamasyn quqyqtyq qoldaný tájiribesindegi olqylyqtarǵa da bailanysty, – dedi Oljas Bektenov.
Premer-ministrdiń aitýynsha, mundai zań buzýshylyqtar áli de jalǵasyp jatyr. Osyǵan bailanysty ol Qarjy ministrligi men Ónerkásip jáne qurylys ministrligine máseleni qysqa merzimde sheshýdi tapsyrdy.
Atap aitqanda, eki vedomstvoǵa 10 kún ishinde Qazaqstanǵa avtokólikterdiń zańsyz ákelinýine tosqaýyl qoiatyn keshendi is-sharalar josparyn ázirlep, Úkimetke usyný júkteldi.
Úkimet basshysy bul baǵyttaǵy jumysty kúsheitip, kedendik rásimderdegi zańnamalyq olqylyqtardy joiý qajettigin de atap ótti.
