Prezident Qasym-Jomart Toqaev 27 qyrkúiekte Qorǵanys ministrliginiń basshylyq quramymen ótken arnaiy keńeste áskerdegi jaǵdaiǵa baǵa berdi. Memleket basshysy ministrliktiń jumysyna jan-jaqty tekserý júrgizip, on kún ishinde armiiany reformalaý josparyn ázirleýdi tapsyrdy. Memleket qabyldap jatqan sharalarǵa qoǵamnyń kózqarasyn bilý úshin «Demokratiia institýty» ǵylymi-zertteý qaýymdastyǵy 28-29 qyrkúiekte qoǵamdyq pikirdi zertteý maqsatynda saýalnama júrgizdi, dep habarlaidy Ult.kz.
Saýalnama nátijesi armiianyń qazirgi jaǵdaiy men bolashaǵy kópshilik nazarynda ekenin kórsetti. Qatysýshylardyń 85,2%-y Prezidenttiń Qorǵanys ministrligin keshendi tekserý týraly sheshimin tolyq nemese ishinara qoldaidy.
Qarýly Kúshterdi reformalaý týraly sheshimge de osyndai kózqaras qalyptasqan. Memleket basshysynyń bul sheshimin oń baǵalaǵandardyń úlesi de joǵary – 85,7%.
Saýalnamaǵa qatysýshylar armiiada qandai ózgerister qajet ekenin de aitty. Bul suraqqa birneshe jaýap tańdaýǵa múmkindik berildi. Eń kóp atalǵan usynys – Qorǵanys ministrliginiń ashyqtyǵy men eseptiligin arttyrý (47,4%). Budan keiin komandalyq quramdy jańartý jáne onyń kásibi deńgeiin kóterý (34,3%), sondai-aq qorǵanys salasyndaǵy jemqorlyqqa qarsy kúresti kúsheitý (29,4%) tur.
Áskeri qyzmettiń kúndelikti jaǵdaiyna qatysty máseleler de nazardan tys qalǵan joq. Saýalnamaǵa qatysýshylardyń 25,3%-y olardyń qaýipsizdigi men áleýmettik jaǵdaiyn jaqsartýdy mańyzdy dep sanaidy. Qarý-jaraq pen áskeri tehnikany jańartýdy 20,7%, jańa tehnologiialardy, onyń ishinde tsifrlyq sheshimderdi engizýdi 20,4%, al jaýyngerlik daiarlyq pen oqý-jattyǵý deńgeiin kóterýdi 19,2% ataǵan.
Saýalnama nátijesi qoǵamnyń armiiada jan-jaqty ózgeris kútetinin kórsetedi. Eldiń qorǵanys qabiletin nyǵaitýmen qatar, jurt áskeri qyzmettiń kúndelikti uiymdastyrylýy da jaqsarǵanyn qalaidy.
Prezident bastamalaryn qoldaýdyń joǵary deńgeii reformanyń nátijesine qatysty naqty talaptarmen ushtasyp otyr. Halyq reformany armiianyń áskeri-tehnikalyq áleýeti qanshalyqty artqanymen ǵana emes, áskeri qyzmettiń jaǵdaiy men qaýipsizdigi qalai ózgergenimen de baǵalaidy.
Saýalnamany «Demokratiia institýty» ǵylymi-zertteý qaýymdastyǵy 2026 jylǵy 28-29 qyrkúiekte onlain-saýalnama (CAWI) ádisimen júrgizdi. Zertteýge 17 oblys pen respýblikalyq mańyzy bar úsh qala – Astana, Almaty jáne Shymkentten 18 jastan asqan 1012 respondent qatysty.
