AQSh-tyń Niý-Iork qalasynda 44 jastaǵy Qazaqstan týmasy Ǵalymjan Abaildaev Brýklin kópirinen sekirip, ǵajaiyp jaǵdaida aman qaldy, dep habarlaidy ult.kz.
New York Post basylymynyń málimetinshe, er adam kópirdiń shamamen 85 metr biiktiktegi soltústik munarasynan Ist-River ózenine sekirgen. Oǵan deiin ol kópirge birneshe tý, sonyń ishinde Qazaqstannyń memlekettik týyn ornatqan.
Politsiia qyzmetkerleri er adamdy sýdan shyǵaryp, Bellevue aýrýhanasyna jetkizdi. Dárigerler onyń jaǵdaiyn turaqty dep baǵalaǵan.
Basylymnyń jazýynsha, Abaildaevtyń birge turatyn kórshisi onyń bul áreketti týǵan kúnine josparlaǵanyn aitqan.
Qazir er adamǵa qaýipsizdikke qater tóndirý, qoǵamdyq orynda ádepsiz áreket jasaý jáne qoǵamdyq tártipti buzý baptary boiynsha aiyp taǵylǵan. Ol aýrýhanada em qabyldap jatyr jáne sotty sol jerde kútedi.
