Bul norma atqarýshylyq is júrgizýdi jetildirý máseleleri boiynsha qabyldanǵan zańnamalyq túzetýlerde kózdelgen. QR ádilet vitse-ministri Daniel Vaisovtyń aitýynsha, attestattaý jeke sot oryndaýshylarynyń kásibi daiarlyq deńgeii men zańnamany bilý dárejesin obektivti baǵalaýǵa múmkindik beredi, dep habarlaidy ult.kz.
«Qaita attestattaýdan óte almaǵan jaǵdaida bul jeke sot oryndaýshysynyń litsenziiasynan aiyrýǵa negiz bolady», – dedi spiker OKQ alańynda ótken baspasóz konferentsiiasynda.
Sonymen qatar, jeke sot oryndaýshylarynyń kómekshileri men taǵylymdamadan ótýshilerge qoiylatyn talaptar kúsheitiledi. Sońǵy úsh jyl ishinde sybailas jemqorlyq quqyq buzýshylyqtary úshin jaýapkershilikke tartylǵan tulǵalar bul salada jumys istei almaidy. Jeke sot oryndaýshylarynyń qyzmetin baqylaý jónindegi ádilet organdarynyń ókilettikteri keńeitiledi.
«Ádilet organdary men Jeke sot oryndaýshylarynyń respýblikalyq palatasyna josparly jáne jospardan tys baqylaý júrgizý kezinde jeke sot oryndaýshylarynyń banktik shottary boiynsha úzindi kóshirmelerdi talap etý quqyǵy beriledi. Buǵan deiin jeke sot oryndaýshylary mundai málimetterdi usynýdan bas tartýǵa quqyly bolatyn jáne kóp jaǵdaida solai jasaityn», – dedi QR ádilet vitse-ministri.
