Qazaqstan Respýblikasy Úkimetiniń qaýlysymen qan donorlary úshin alǵash ret resmi túrde «Qurmetti donor» marapaty taǵaiyndaldy, dep habarlaidy ult.kz.
Qurmet belgisiniń alǵashqy iegerleri bekitilgen talaptarǵa tolyq sáikes keletin 481 turaqty donor bolady. Qazaqstan Respýblikasy Úkimetiniń qabyldaǵan qaýlysyna sáikes vedomstvolyq tósbelgi Qazaqstan Respýblikasynyń azamattaryna, sondai-aq sheteldikter men azamattyǵy joq adamdarǵa óteýsiz negizde donorlyq jasaǵany úshin beriledi. Atap aitqanda:
- qan jáne (nemese) trombotsit donorlyǵy – keminde 40 ret,
- qan plazmasynyń donorlyǵy – keminde 70 ret bolýy tiis.
Bul sheshim arqyly Úkimet adam ómirin qutqarý jolynda turaqty ári óteýsiz donorlyq jasap júrgen qazaqstandyqtardyń eńbegine tarihi ádildik ornatty. Endi olardyń igi isi erekshe mártebemen aiqyndalyp, joǵary baǵalanyp otyr.
Tósbelgilerin daiyndaýdy Qazaqstan teńge saraiy júzege asyrady. Medaldiń árbir bólshegi tereń maǵynalyq mánge ie jáne Qazaqstan Respýblikasy Geraldika jónindegi respýblikalyq komissiiasy bekitken.
Bekitilgen dizainǵa sáikes tósbelginiń negizgi simvoly qanyq qyzyl tústi emalmen kómkerilgen qan tamshysy túrinde jasalǵan. Tamshynyń ishinde aq tústi emalmen beinelengen júrek soǵysynyń grafikalyq yrǵaǵy ornalasqan. Barlyq kompozitsiia kúńgirt óńdelgen dóńgelek jiekpen qorshalǵan.
Jyl saiyn Qazaqstanda 180 myńnan astam azamat donor atanyp, 255 myńnan astam donorlyq rásim jasaidy. Sonyń nátijesinde jyl saiyn 80 myńnan astam patsientke sapaly qan quiý kómegi kórsetilip, olardyń ómirin saqtap qalýǵa jáne saýyǵýyna múmkindik beriledi.
«Halyq densaýlyǵy jáne densaýlyq saqtaý júiesi týraly» Qazaqstan Respýblikasynyń Kodeksine sáikes meditsinalyq tekserýden ótý jáne qan men onyń komponentterin tapsyrý kúnderi donor bolyp tabylatyn qyzmetker jumys berýshi tarapynan ortasha jalaqysy saqtala otyryp jumystan bosatylady.
