Qazaqstanda 2026 jylǵy mamyr aiynda ailyq infliatsiia deńgeii 0,7 paiyzdy qurady. Bul týraly Ulttyq statistika biýrosynyń málimetinde aityldy, dep habarlaidy ult.kz.
Statistikaǵa sáikes, bir ai ishinde azyq-túlik taýarlarynyń baǵasy 0,4 paiyzǵa, azyq-túlikke jatpaityn taýarlar 0,6 paiyzǵa, al aqyly qyzmetter 1,1 paiyzǵa qymbattaǵan.
Mamyr aiynda birqatar kókónis baǵasy aitarlyqtai arzandady. Atap aitqanda, qiiar 25,4 paiyzǵa, qyzanaq 25,1 paiyzǵa, tátti burysh 8,3 paiyzǵa, sarymsaq 3,1 paiyzǵa, mandarin 2,6 paiyzǵa jáne qyzylsha 2 paiyzǵa tómendegen. Sonymen qatar kúnbaǵys maiy men konservilengen júgeriniń baǵasy da 0,4 paiyzǵa arzandaǵan.
Al qoi eti 4,7 paiyzǵa, siyr baýyry men maidaǵy shprottar 3,3 paiyzǵa, alma 3,1 paiyzǵa, shujyq 1,7 paiyzǵa, sút 1,1 paiyzǵa qymbattaǵan. Jumyrtqa men airan baǵasy da ósken.
Azyq-túlikke jatpaityn taýarlar arasynda taba, ydys jýǵysh mashina, kitap jáne smartfon baǵasy arzandasa, fotoapparat, útik, sharýashylyq sabyn jáne dári-dármek quny ósken.
Qyzmet kórsetý salasynda balalar attraktsiondary qyzmeti 6,6 paiyzǵa qymbattaǵan. Sondai-aq kólik qyzmetteri men avtokólik jýý qyzmetteriniń baǵasy da óskeni baiqalady.
Jyldyq kórsetkish boiynsha infliatsiia deńgeii 10,4 paiyzdy qurady. Bul rette azyq-túlikke jatpaityn taýarlar 11,7 paiyzǵa, azyq-túlik ónimderi 10,7 paiyzǵa jáne aqyly qyzmetter 8,7 paiyzǵa qymbattaǵan.
Ótken jyldyń mamyrymen salystyrǵanda qiiar, piiaz, qyzanaq, kartop, banan jáne kúrish baǵasy arzandaǵan. Kerisinshe, alma, muzdatylǵan balyq, qara shai, makaron ónimderi men qant baǵasy ósken.
Sonymen qatar otandyq jeńil avtokólikterdiń baǵasy bir jylda 17,9 paiyzǵa tómendegen. Al sharýashylyq sabyn, erler shalbary, kir jýǵysh untaq jáne turmystyq tehnika baǵasy aitarlyqtai qymbattaǵan.
Qyzmet kórsetý sektorynda kólik qyzmetteri 11,1 paiyzǵa, qonaqúi qyzmetteri 10,3 paiyzǵa, bilim berý qyzmetteri 8,9 paiyzǵa jáne mobildi bailanys qyzmetteri 7,6 paiyzǵa qymbattaǵan.
Aita keteiik, tutyný baǵalary indeksi eldegi infliatsiia deńgeiin sipattaityn negizgi kórsetkish bolyp tabylady. Ol ai saiyn 537 túrli taýar men qyzmet túriniń baǵasyn baqylaý negizinde esepteledi.
