25 tamyzdan bastap Qazaqstanda aliment aýdarý tártibi ózgeredi. Ózgeris sot oryndaýshylary arqyly óndiriletin aliment tólemderine qatysty bolady, dep habarlaidy ult.kz.
Endi aliment alýshy arnaiy bank shotyn ashyp, onyń derektemelerin sot oryndaýshysyna usynýy qajet. Aliment qarajaty osy arnaiy shotqa aýdarylady. Ministrlik málimetinshe, bul talap atqarýshylyq is júrgizý aiasynda aliment alatyn óndirip alýshylarǵa qatysty qoldanylady.
"Talap atqarýshylyq is júrgizý aiasynda aliment alatyn óndirip alýshylarǵa qatysty. Olar arnaiy bank shotyn ashyp, onyń derektemelerin sot oryndaýshysyna usynýǵa mindetti", – delingen habarlamada.
Arnaiy shottyń basty ereksheligi – ondaǵy qarajatqa tyiym salynbaidy. Demek bul aqsha aliment alýshynyń ózge bereshekterin óteý úshin óndirip alynbaidy. Qarajat tek balany nemese eńbekke qabiletsiz adamdy asyraýǵa jumsalady.
Sonymen qatar arnaiy shottyń bolmaýy aliment tóleýshini óz mindetinen bosatpaidy.
"Óndirip alýshy bank shotynyń qajet derektemelerin usynǵanǵa deiin óndirilgen qarajatty aýdarý múmkin bolmaidy. Alaida aliment boiynsha bereshek eseptelýin jalǵastyrady jáne esepten shyǵarylmaidy", – dep málimdedi Ádilet ministrligi.
