Qazaqstannyń birqatar óńirinde aldaǵy kúnderi aýa raiy kúrt ózgerip, jańbyr men qar jaýady. Kei jerlerde jeldiń ekpini sekýndyna 30 metrge jáne odan da joǵary jyldamdyqqa jetýi múmkin, dep habarlaidy ult.kz.
«Qazgidromet» málimetinshe, Astanada 4 qazan kúnniń sońynda jáne 5 qazanda táýlik boiy jaýyn-shashyn, onyń ishinde jańbyr men qar kútiledi. 4 qazanda kúndiz ońtústik-batystan soǵatyn jeldiń ekpini 15-20, kei ýaqytta 25 m/s-qa deiin jetedi. 5 qazanda jel 15-20 m/s bolyp, ekpini 23-28 m/s-qa, kúndiz kei ýaqytta 30 m/s jáne odan da joǵary deńgeige jetýi yqtimal.
Elordada aýa temperatýrasy da aitarlyqtai tómendeidi. 4 qazanda kúndiz 8-10 gradýs jyly bolsa, 5 qazanda túnde 0-2, kúndiz 3-5 gradýs jyly bolady.
Osyndai aýa raiy Aqmola, Qostanai jáne Soltústik Qazaqstan oblystarynda da kútiledi. Bul óńirlerde 4-5 qazanda jańbyr men qar jaýyp, kei jerlerde qatty jaýyn-shashyn bolady. Jeldiń ekpini jekelegen aýdandarda 30 m/s jáne odan da joǵary bolýy múmkin.
Batys Qazaqstan oblysynda 3 qazanda jaýyn-shashyn, onyń ishinde jańbyr men qar jaýady. Oblystyń soltústiginde kúndiz qatty jaýyn-shashyn kútiledi. 3-4 qazanda jeldiń jyldamdyǵy 15-20 m/s, al kei jerlerde ekpini 25 m/s-qa deiin jetedi.
Atyraý oblysynda 3 qazanda táýlik boiy jáne 4 qazanǵa qaraǵan túni jańbyr men qar jaýady. 3-4 qazanda soltústik-batystan soǵatyn jeldiń kúshi 15-20 m/s, 4 qazanda jekelegen aýdandarda 25 m/s bolady.
Ulytaý, Qaraǵandy jáne Pavlodar oblystarynda da 4-5 qazanda jel kúsheiip, kei jerlerde ekpini 30 m/s jáne odan joǵary bolýy múmkin. Bul óńirlerde aýa temperatýrasy birneshe gradýsqa tómendeidi.
Almaty jáne Jetisý oblystarynda 5 qazanda kúndiz aýa temperatýrasy 10-15 gradýsqa, taýly aýdandarda 5 gradýs jylyǵa deiin kúrt tómendeidi.
Sonymen qatar 2 qazanda birqatar óńirde jańbyr, naizaǵai, tuman jáne qatty jel kútiledi. Almaty, Shymkent, Jetisý, Jambyl, Túrkistan jáne basqa da oblystarda órt qaýpi saqtalady.
Meteorologtar aýa raiynyń ózgerýine bailanysty birneshe óńirde daýyldy eskertý jariialaǵan.
