Ishki ister ministrligi Qazaqstanda josparlanyp otyrǵan qylmystyq jáne ákimshilik amnistiianyń kimderge qoldanylýy múmkin ekenin túsindirdi, dep habarlaidy ult.kz.
Vedomstvonyń málimetinshe, jańa Konstitýtsiianyń qabyldanýyna bailanysty Memleket basshysy amnistiia jariialaý bastamasyn kótergen. Bul qadam ádilettilik, gýmanizm jáne adam quqyqtaryn qurmetteý qaǵidattaryna negizdelgen.
IIM ókilderiniń aitýynsha, amnistiia qylmysqa kóz juma qaraý emes, qoǵamǵa úlken qaýip tóndirmeitin azamattardyń qalypty ómirge qaita oralýyna múmkindik beretin quqyqtyq shara bolyp sanalady.
Qylmystyq amnistiia kimderge qatysty bolady?
Zań jobasyna sáikes, amnistiia:
- qylmystyq teris qylyq jasaǵandarǵa;
- onsha aýyr emes qylmys úshin sottalǵandarǵa;
- aýyrlyǵy ortasha qylmys jasaǵan jáne keltirilgen zalaldy tolyq ótegen azamattarǵa qoldanylýy múmkin.
Sonymen qatar keibir sottalǵandardyń jaza merzimin qysqartý qarastyrylǵan.
Aldyn ala esep boiynsha, qylmystyq amnistiia 15 myńnan astam adamdy qamtýy yqtimal. Onyń ishinde shamamen 1,5 myń adam túzeý mekemelerinen bosatylýy múmkin.
Amnistiia kimderge júrmeidi?
Zań jobasy boiynsha amnistiia:
- terrorizm jáne ekstremizm qylmystaryn jasaǵandarǵa;
- sybailas jemqorlyq qylmystary úshin sottalǵandarǵa;
- uiymdasqan qylmystyq top múshelerine;
- azaptaý faktileri boiynsha sottalǵandarǵa;
- jynystyq qolsuǵýshylyq jasaǵandarǵa, ásirese kámeletke tolmaǵandarǵa qarsy qylmys jasaǵandarǵa;
- qylmysty qaitalap jasaǵan adamdarǵa qoldanylmaidy.
IIM mundai shekteýler qoǵamdyq qaýipsizdikti qamtamasyz etý úshin engizilgenin atap ótti.
Ákimshilik amnistiia neni qamtidy?
Qazaqstan tarihynda alǵash ret ákimshilik amnistiia ótkizý usynylyp otyr.
Jobaǵa sáikes, azamattar, jeke kásipkerler, notariýstar, advokattar jáne jeke sot oryndaýshylary 2026 jylǵy 17 naýryzǵa deiin jasalǵan birqatar ákimshilik quqyq buzýshylyqtar úshin tólenbegen aiyppuldardan bosatylýy múmkin.
IIM dereginshe, tek ministrlik baǵyty boiynsha bul shara 17 milliard teńgeden astam somaǵa jýyq 1 million ákimshilik aiyppuldy qamtidy.
Qandai aiyppuldar keshirilmeidi?
Ákimshilik amnistiia:
- esirtki men qarýdyń zańsyz ainalymyna qatysty quqyq buzýshylyqtarǵa;
- mas kúiinde kólik júrgizýge;
- qarsy jolaqqa shyǵýǵa;
- júrgizýshi kýáliginen aiyrýǵa ákeletin basqa da óreskel jol qozǵalysy erejelerin buzýǵa;
- qaitalanǵan quqyq buzýshylyqtarǵa;
- sot qaraityn ákimshilik isterge qoldanylmaidy.
Qazirgi ýaqytta amnistiia týraly zań jobasy Qazaqstan Respýblikasy Parlamenti Májilisi qaraýynda jatyr. Eger qujat qabyldansa, myńdaǵan azamattyń quqyqtyq jáne qarjylyq júktemesi jeńildeýi múmkin.
