Qazaqstanda aýqymdy jasandy intellekt klasterin salý josparlanyp otyr, dep habarlaidy ult.kz.
Bul baǵyttaǵy ózara túsinistik týraly úshjaqty memorandýmǵa Qazaqstan Respýblikasy Prezidenti janyndaǵy Sheteldik investorlar keńesiniń aiasynda QR Jasandy intellekt jáne tsifrlyq damý ministrligi, halyqaralyq Citi korporatsiiasy jáne Freedom Holding Corp qol qoidy.
QR Premer-Ministriniń orynbasary – Jasandy intellekt jáne tsifrlyq damý ministri Jaslan Mádievtiń aitýynsha, joba Memleket basshysynyń tapsyrmasyna sáikes elde jasandy intellektti damytýǵa qajetti infraqurylymdy qalyptastyrýǵa baǵyttalǵan.
«Búginde tehnologiiany tek tutynýshy bolý jetkiliksiz. Qazaqstannyń óz esepteý qýaty men AI-sheshimderin ázirleýge arnalǵan múmkindikteri bolýy qajet. Bul memorandým álemdik deńgeidegi jasandy intellekt klasterin qurý jolyndaǵy mańyzdy qadam. Bolashaqta bul alań investitsiialar men tehnologiialyq kompaniialardy tartatyn, ǵylym, biznes jáne memleket úshin mańyzdy infraqurylymǵa ainalady», – dedi ministr.
Citi kompaniiasynyń memlekettik sektormen jumys jónindegi jahandyq basshysy Stefani fon Fridebýrg bul bastama Qazaqstannyń tsifrlyq transformatsiiasyn jedeldetip, memlekettik institýttar, biznes jáne ǵylymi qaýymdastyq úshin joǵary ónimdi esepteý infraqurylymyn qalyptastyrýǵa múmkindik beretinin atap ótti.
Al Freedom Holding Corp bas direktory Timýr Týrlov memorandým Memleket basshysynyń tsifrlandyrý men jasandy intellektti damytý jónindegi strategiialyq baǵytynyń naqty kórinisi ekenin aitty.
Onyń sózinshe, kompaniianyń NVIDIA jáne OpenAI sekildi jetekshi halyqaralyq tehnologiialyq uiymdarmen jumys isteý tájiribesi bar jáne bul saraptama jańa jobany júzege asyrýda paidalanylatyn bolady.
Joba aiasynda zamanaýi GPU-tehnologiialarymen jabdyqtalǵan jasandy intellekt klasteri men memlekettik sektor, ǵylym jáne bizneske qyzmet kórsetetin derekterdi óńdeý ortalyǵyn salý kózdelgen.
Budan bólek, taraptar Qazaqstanda tsifrlyq aktivter ekojúiesin damytý, tsifrlyq banking pen transshekaralyq esep aiyrysý baǵytyndaǵy yntymaqtastyqty keńeitý, sondai-aq qarjy naryǵynda ashyqtyq pen qoljetimdilikti arttyratyn blokchein tehnologiialaryn engizý boiynsha birlesip jumys isteýge ýaǵdalasty.
