«QAZAQSTAN» telearnasynda Naýryz meiramyna arnalǵan beinebaiannyń tusaýy kesildi, dep habarlaidy QazAqparat.
Ulystyń uly kúnine orai arnaiy jazylǵan «Beý, Naýryz!» ániniń avtory - Syrym Nábiqulov, sózin aqyn Erlan Júnis jazǵan. Rejisseri – Jansaia Kópbaeva.
Beinebaian Almaty oblysynyń kórikti jerleri men Ile ózeniniń boiynda, arnaiy turǵyzylǵan nysanda, «Kóshpendiler» filminiń dekoratsiiasynda túsirildi.
Týyndyny dástúrli ánshiler Ardaq Balajanova, Aigúl Qosanova, Erlan Rysqali jáne ótken jyly Ulttyq arna usynǵan «Qazaqstan daýysy» jobasynyń jeńimpazy Quralai Meirambek oryndap shyqty. «Bastaý» toby dombyramen súiemeldep, beinebaiannyń negizgi keiipkerleri retinde arnanyń «Aqparat», «Apta», «Tańsholpan» baǵdarlamasynyń júrgizýshileri qatysty.
Beinebaiannyń negizgi ideiasy ǵasyrlar boiǵy kóshpeliler tarihy men «Jańa Qazaqstannyń» ulttyq mádenietin ushtastyrý, jańarý men jańǵyrýdyń kórinisin beineleý. «Naýryz meiramynyń máni jańarý, jańa kún degendi bildirse, qazaq halqy dál qazir shynaiy jańarý men jańǵyrý kezeńin ótkerýde. Beinebaianda ulys kúniniń mán-maǵynasyn ashýmen qosa, halqymyzdyń búgingi rýhani belesin beineleýdi, keler kúnge degen airyqsha úmitin kórsetýdi maqsat ettik», - deidi rejisser Jansaia Kópbaeva.
Beinebaiannyń shyǵarmashylyq top quramyna kinooperator Erkinbek Pitiráliev, qoiýshy-sýretshi Nurbolat Japaqov, montaj rejisseri retinde Nurtas Mamytpai shaqyryldy.
Ánniń sózi túrik jáne aǵylshyn tiline aýdarylyp, beinebaian halyqaralyq aýditoriiaǵa jol tartpaq.
