Kazmedia ortalyǵynda Qazaqstan telearnasy túsirgen 6 tarihi serialdyń tanystyrylymy ótti, dep habarlaidy QazAqparat agenttigi.
Táýelsizdiktiń 30 jyldyǵy qarsańynda Qazaqstan telearnasy kinosúier qaýymǵa erekshe syi jasamaq.
Sonyń aiasynda «Jáńgir han. Sarai syry», «Ahmet. Ult ustazy», «Domalaq ana», «Táshenev. Taitalas», «Qanysh. Qazyna», «Muqaǵali. Bul ǵasyrdan emespin» tarihi telehikaialarynyń tanystyrylymy ótti.
Aitýly sharaǵa QR Premer-Ministriniń orynbasary Eraly Toǵjanov, QR Aqparat jáne qoǵamdyq damý ministri Aida Balaeva, QR Parlamenti Májilisiniń depýtattary, kino jáne jýrnalistika salasynyń ókilderi qatysty.
Tanystyrylym aldynda sóz alǵan Úkimet basshysynyń orynbasary Eraly Toǵjanov tarihi seraildardyń Táýelsizdik toiynyń qarsańynda kórermenge jol tartqanyn eske saldy.
«Táýelsizdiktiń 30 jylynda qazaqtyń rýhynyń da, namysynyń da, tiliniń de, diliniń de óskenin álem kórdi. Búgin tusaýy kesilip otyrǵan týyndylar osy Táýelsizdiktiń bir úlken nátijesi dep aitsam artyq emes qoi dep oilaimyn. Syrttan alynǵan eshteńe joq bul jerde. Bul – bizdiń naqty ómirimiz. Bul – bizdiń naqty tarihymyz. Qazaq balasynyń basynan ótken qiyn kezeńder de sipattalǵanyn ózderińiz baiqap otyrsyzdar. Mysaly «Táshenev. Taitalas» filminiń astarynda qandai saiasi másele jatqanyn bárińiz jaqsy bilesizder. Ony halyq ta biledi. Biraq sony jetkizip aitýymyz kerek. Tarihi serialdarǵa basymdyq berilýi tegin emes. XVII ǵasyrdaǵy, XIX ǵasyrdaǵy qazaq dalasynyń, qazaq balasynyń basyna túken kúrdeli kezeńderde jol taýyp, eldi alǵa súiregen azamattardyń tulǵasyn ashyp kórsetý – úgingi býynnyń paryzy», - degen vitse-premer Qazaqstan telearnasynyń ujymy men QR Aqparat jáne qoǵamdyq damý ministrligine alǵys bildirdi.
«Bizdiń Aqparat ministrligi keremet jumys jasady dep oilaimyn. Táýelsizdigimizdiń 30 jyldyǵynyń aldynda osyndai qundy dúnielerdi halyqtyń aldyna shyǵaryp, elimizge kórsete alsaq, halyqtyń júregine jete alsaq, úlken jeńis qoi dep oilaimyn. Sol jolda úlken qadam jasaldy. Ár túrli oilar, pikirler bolýy múmkin. Degenmen halyqtyń oiy bir jerden shyǵatynyna senemin. Nege deseńizder, naqty tarihi sátterimizdi shamamyz kelgenshe elge jetkizýge mindettimiz. Solai bolatynyn meniń eshqandai kúmánim joq. Kórermender de óz baǵasyn bere jatar», - dedi Eraly Toǵjanov.
