Qazaqstan teatrlary jańa maýsymdy jańa qoiylymdarmen, halyqaralyq jobalarmen jáne jańarǵan infraqurylymmen bastaidy. 2025–2026 jylǵy maýsym qorytyndysy boiynsha elimizdiń teatrlarynda 16 myń spektakl qoiylyp, 410 premera sahnalanǵan. Qoiylymdardy 2,8 mln-nan astam kórermen tamashalaǵan, dep habarlaidy ult.kz.
Jańa maýsymda birqatar teatr kórermenge jańa qoiylymdaryn usynady.
«Astana Balet» XIV maýsymyn 28 jáne 29 tamyzda Korei ulttyq baletiniń gastroldik qoiylymdarymen ashady. Kórermender Adolf Adannyń mýzykasyna jazylǵan «Korsar» baletin tamashalai alady. Teatrdyń halyqaralyq baǵdarlamasy Vetnam, Frantsiia jáne Aýstriiadaǵy gastroldermen jalǵasady.
«Astana Opera» XIV maýsymyn 4 jáne 5 qyrkúiekte Ahmet Jubanov pen Latif Hamididiń «Abai» operasymen ashady. Biyl kompozitorlardyń 120 jyldyǵyna orai bul qoiylymǵa erekshe mán berilip otyr. Sonymen qatar jańa maýsymda «Charli i Iren», «Tomiris» baletteri jáne balalarǵa arnalǵan «Arman» mýzykalyq spektakli kórermenge jol tartady.
Al Abai atyndaǵy Qazaq ulttyq opera jáne balet teatry 93-maýsymyn «Aqbala» ulttyq baletiniń premerasymen bastaidy. Qoiylym Ábdijámil Nurpeiisovtiń «Qan men ter» trilogiiasynyń jelisi boiynsha alǵash ret balet janrynda sahnalanbaq.
Balalarǵa arnalǵan qoiylymdar kóbeiedi
Jańa maýsymda balalar men jasóspirimderge arnalǵan spektaklderge de basymdyq berilmek.
2026 jyldyń qańtar–maýsym ailarynda elimizdiń teatrlary 3 948 balalar spektaklin kórsetken. Olardy 559 885 jas kórermen tamashalaǵan.
Bul baǵytta balalar men jasóspirimder, qýyrshaq jáne jastar teatrlary jumys istep keledi.
Ǵabit Músirepov atyndaǵy Qazaq memlekettik akademiialyq balalar men jasóspirimder teatry biyl 80 jyldyǵyn atap ótedi. Teatrdyń «Ulpan» spektakli Bishkekte ótken «ART-ORDO» halyqaralyq teatr festivalinde Gran-pri ielenip, taǵy úsh atalym boiynsha júldege ie boldy.
Teatrlar shetelge de gastrolge shyǵady
2026 jyldyń alǵashqy jartyjyldyǵynda qazaqstandyq teatrlar 407 gastroldik sapar uiymdastyrǵan. Onyń 394-i Qazaqstan ishinde, 13-i shetelde ótken.
Sheteldegi gastrolderdiń qatarynda Abai atyndaǵy Qazaq ulttyq opera jáne balet teatrynyń Singapýrǵa, Ǵabit Músirepov atyndaǵy teatrdyń Túrkiiaǵa sapary bar.
Qazaqstandyq teatr ókilderi halyqaralyq baiqaýlarda da júldege ie boldy. «Astana Opera» teatrynyń «El Voice» vokal toby «Soldatskii konvert» halyqaralyq baiqaý-festivalinde Gran-pri jeńip aldy. Al teatr skripkashysy Baǵdat Ábilhanov Qytaidyń Dalian qalasynda ótken GRAND ART EXPRESS-CHINA halyqaralyq baiqaýynda I oryn aldy.
Almatydaǵy teatrlar jańartylady
Teatr infraqurylymyn jańartý jumystary da jalǵasyp jatyr.
Almatyda Muhtar Áýezov atyndaǵy Qazaq ulttyq drama teatry qaita jańǵyrtylýda. Joba aiasynda ǵimarattyń tarihi kelbetin saqtaý, injenerlik júielerin jańartý jáne kórermender men shyǵarmashylyq ujymǵa zamanaýi jaǵdai jasaý kózdelgen.
Al Natalia Sats atyndaǵy orys memlekettik akademiialyq balalar men jasóspirimder teatryn jańartý jumystary aiaqtalýǵa jaqyn. Qazirgi tańda nysannyń qurylys daiyndyǵy 98 paiyzǵa jetken. Teatrdyń tarihi ǵimaraty men jańa japsarjaiyndaǵy negizgi jumystar aiaqtalyp, injenerlik júieler men sahna jabdyqtary ornatylǵan.
Teatr ǵimaraty 7 qarashada, teatrdyń týǵan kúninde qaita ashylady dep josparlanyp otyr.
