Namangan qalasynda ótken Maqom óneriniń III halyqaralyq forýmy aiasynda «Shyǵys maqomynyń jańa baǵyttary: dástúr men jańashyldyq sabaqtastyǵy» atty halyqaralyq ǵylymi-tájiribelik konferentsiia uiymdastyryldy, dep habarlaidy ult.kz.
Forýmnyń saltanatty ashylý rásimine Ózbekstan Prezidenti Shavkat Mirziioev qatysyp, jiyn qonaqtaryna arnap sóz sóiledi.
Konferentsiia jumysyna Qazaqstan Respýblikasy Mádeniet jáne aqparat vitse-ministri Aibek Sydyqov qatysyp, Memleket basshysy Qasym-Jomart Toqaevtyń mádenietti damytýǵa, tarihi murany saqtaýǵa jáne ulttyq qundylyqtardy qoldaýǵa erekshe kóńil bóletinin atap ótti.
Vitse-ministrdiń aitýynsha, maqom óneri Qazaqstannyń dástúrli mýzyka mádenietimen úndesedi. Ol kúi, jyr, terme, aitys jáne dástúrli án óneri ulttyq rýhani muranyń ajyramas bóligi ekenin jetkizdi.
Konferentsiia barysynda dástúrli ónerdi tsifrlyq dáýirde saqtaý máseleleri talqylandy. Qatysýshylar mádeni murany tsifrlandyrý, zamanaýi tehnologiialardyń múmkindikterin paidalaný jáne jastardyń klassikalyq mýzykaǵa qyzyǵýshylyǵyn arttyrý joldary jóninde pikir almasty.
Jiynda Qazaqstan men Ózbekstan arasyndaǵy mádeni yntymaqtastyqqa da erekshe nazar aýdaryldy. Atap aitqanda, «Saltanat» memlekettik bi ansambliniń Hiýa qalasynda ótken III halyqaralyq «Lazgi» bi festivalinde «Eń úzdik sahnalanǵan bi» atalymyn jeńip alǵany aityldy. Sonymen qatar ózbekstandyq ónerpazdardyń Halyq qaharmany Roza Baǵlanova atyndaǵy halyqaralyq vokal baiqaýyna qatysyp, baiqaý qorytyndysy boiynsha Mýhaddas Alievanyń arnaiy júldege ie bolǵany atap ótildi.
Forým aiasyndaǵy mańyzdy oqiǵalardyń biri – Ándijan qalasyna Túrki áleminiń mádeni astanasy mártebesiniń berilýi boldy. Aita keteiik, bul ataq ótken jyly Aqtaý qalasyna berilgen edi.
Is-sharaǵa IýNESKO, ISESKO, TMD, ShYU, Túrki memleketteri uiymy, TÚRKSOI jáne ózge de halyqaralyq qurylymdardyń ókilderi qatysty. Forýmǵa álemniń 80-nen astam elinen 250-ge jýyq mádeniet jáne óner qairatkeri jinalsa, konferentsiia alańynda 60-qa jýyq elden kelgen 100-den astam ǵalym men maman bas qosty. Baǵdarlamaǵa barlyǵy 121 ǵylymi eńbek engizildi.
