Qazaqstan azamattaryn Ońtústik Koreia Respýblikasyna jumysqa ornalastyrý Employment Permit System (EPS) júiesi arqyly júzege asyrylady. Irikteýdiń praktikalyq kezeńi Almaty qalasynda EPS ortalyǵy ashylǵannan keiin bastalady, dep habarlaidy ult.kz.
Qazaqstan Respýblikasynyń Eńbek jáne halyqty áleýmettik qorǵaý ministrligi habarlaǵandai Kandidattar korei tilin EPS-TOPIK testi arqyly tapsyryp, kásibi bilimi men daǵdylaryn kórsetedi. Irikteý kezinde bilimi, eńbek ótili jáne kásibi sertifikattary da eskeriledi.
Ońtústik Koreiada jumys isteýge 18-39 jas aralyǵyndaǵy azamattar qatysa alady. Úmitkerdiń sottalmaǵan bolýy, Koreiadan buryn kúshtep shyǵarylmaǵany, elge kirýge tyiym salynbaǵany jáne Qazaqstannan shyǵýyna shekteý bolmaýy qajet. Sonymen qatar jaramdy tólqujat pen meditsinalyq tekserýden ótý mindetti.
Barlyq talapqa sai kelip, irikteýden ótken azamattar resmi jumys izdeýshiler tizimine engiziledi. Olardyń bilimi, tájiribesi, sertifikattary men test nátijeleri kórsetilgen málimetter koreilik jumys berýshilerge usynylady.
Alaida EPS-TOPIK emtihanynan ótý jáne kandidattar tizimine ený Ońtústik Koreiada jumysqa ornalasýǵa kepildik bermeidi. Sońǵy sheshimdi koreilik jumys berýshi qabyldaidy. Jumysqa qabyldanatyn qazaqstandyqtardyń sany jyl saiyn Koreia tarapy belgileitin kvotaǵa bailanysty bolady.
Jumys berýshi kandidatty tańdaǵannan keiin eńbek sharty jasalady. Odan soń Almatydaǵy EPS ortalyǵynda aldyn ala daiyndyqtan ótip, jumys vizasy rásimdelgennen keiin azamat Koreiaǵa attanady.
EPS júiesi boiynsha jumys isteý merzimi úsh jylǵa deiin. Zańda kózdelgen jaǵdailarda ony taǵy 1 jyl 10 aiǵa uzartýǵa bolady.
Eńbek ministrligi azamattardy jeke deldaldarǵa aqsha nemese qujat bermeýge shaqyrady. «Koreiaǵa jumysqa mindetti túrde ornalastyramyz» nemese «irikteýden jedel ótkizemiz» degen ýádelerge senýge bolmaidy. Sebebi jumysqa qabyldaý týraly túpkilikti sheshimdi tek koreilik jumys berýshi qabyldaidy.
Tirkeýdiń naqty merzimi, qujat tapsyrý tártibi jáne EPS-TOPIK testiniń ótkizilý ýaqyty týraly aqparat Eńbek jáne halyqty áleýmettik qorǵaý ministrliginiń resmi resýrstarynda qosymsha jariialanady.
