«Qazaqmys» kompaniialar tobynyń iesi Nurlan Artyqbaev Qazaqstan Respýblikasynyń Ónerkásip jáne qurylys ministri Ersaiyn Naǵaspaevpen birge Jezqazǵan óndiristik alańynyń negizgi nysandaryn aralady, dep habarlaidy ult.kz.
Jumys sapary barysynda investitsiialyq jobalardy iske asyrý nátijesi, óndiristiń tiimdiligin arttyrý, ónerkásiptik qaýipsizdikti qamtamasyz etý, ekologiialyq jańǵyrtý jáne óndiristik qýatty odan ári damytý máseleleri qaraldy.
Sapar aiasynda Jezqazǵan mys balqytý zaýytyna erekshe nazar aýdaryldy. Basshylyqqa óndiristik qýattyń senimdiligin arttyrý baǵdarlamasy sheńberinde júzege asyrylyp jatqan jabdyqty kúrdeli jóndeý jáne jańǵyrtý jobalary tanystyryldy.
Foto: Qazaqmys
Kásiporyndardy ekologiialyq jańǵyrtý máselesine basymdyq berilýde. Jezqazǵan mys balqytý zaýytynda, «Qazkat» zaýytynda jáne Jezqazǵan baiytý fabrikalarynyń súzgileý-keptirý bólimshelerinde quny shamamen 4 mln AQSh dollaryn quraityn gazdandyrý jobasy tolyq aiaqtaldy. Joba aiasynda 20 óndiristik nysan paidalanýǵa berilip, negizgi tehnologiialyq jabdyq mazýttan tabiǵi gazǵa kóshirildi.
Jobany iske asyrý nátijesinde Jezqazǵan mys balqytý zaýytyndaǵy parniktik gaz shyǵaryndylary 11,79%-ǵa tómendedi, al súzgileý-keptirý bólimshelerindegi kórsetkish shamamen 80%-ǵa qysqardy. Jobanyń jyl saiynǵy ekonomikalyq tiimdiligi shamamen 4 mlrd teńge dep baǵalanýda.
Sondai-aq metallýrgiialyq keshendi odan ári damytýǵa baǵyttalǵan perspektivalyq jobalar tanystyryldy. Olardyń qatarynda quny 200 mln AQSh dollaryn quraityn jańa kúkirt qyshqyly tsehynyń qurylysy bar. Bul joba kúkirt dioksidi shyǵaryndylaryn eki eseden astam qysqartýǵa jáne óndiristi zamanaýi ekologiialyq standartqa sáikestendirýge múmkindik beredi.
Basym baǵyttardyń qatarynda qýaty 35 MVt bolatyn gazporshendi elektr stantsiiasyn salý jobasy da bar. Jobaǵa salynatyn investitsiia kólemi 24,8 mln eýrony quraidy. Ony iske asyrý kásiporynnyń energetikalyq táýelsizdigin arttyrýǵa múmkindik berip, jyl saiyn shamamen 5,5 mlrd teńge únemdeýdi qamtamasyz etedi.
Sapar barysynda delegatsiia №1, №2 jáne №3 Jezqazǵan baiytý fabrikalaryna da bardy. Onda tehnologiialyq jabdyqty jańǵyrtý, shikizatty óńdeý tiimdiligin arttyrý jáne óndiristik infraqurylymdy odan ári damytý máseleleri qaraldy.
Sapar qorytyndysynda Nurlan Artyqbaev Jezqazǵan óndiristik alańyn jańǵyrtý kompaniia damýynyń strategiialyq baǵytynyń biri bolyp qala beretinin atap ótti. Sondai-aq ol óndiris, ekologiia, qaýipsizdik jáne kásiporyndardy tehnologiialyq turǵydan jańartý baǵyttaryna investitsiia quiý aldaǵy ýaqytta da jalǵasatynyn jetkizdi.
