«Qazaqmys korporatsiiasy» JShS-nyń «Itaýyz» shahtasynda jańa jeldetý júiesi paidalanýǵa berildi. Ol ónerkásiptik qaýipsizdik deńgeiin arttyrýǵa jáne jerasty qazbalaryndaǵy eńbek jaǵdaiyn jaqsartýǵa múmkindik beredi.
Jobany iske asyrý úshin biiktigi 180 metr bolatyn jeldetýge arnalǵan tik oqpan qazyldy. Jumys biyl sáýir aiynda aiaqtaldy.
Mamyr aiynda shahtanyń ústine nemister óndirgen Korfmann AL 17-2500 úlgisindegi eki ostik jeldetkishi ornatyldy. Jańa jeldetý júiesi sekýndyna 150 tekshe metrge deiin aýa ótkize alady. Bul jerasty qabatynyń turaqty ári tiimdi jeldetilýin qamtamasyz etedi.
Joba kompaniianyń jerasty kenishterindegi jeldetý infraqurylymyn damytýǵa baǵyttalǵan júieli jumysynyń bir bóligi bolyp tabylady. Osyǵan uqsas júie buǵan deiin «Jomart» kenishinde iske qosylǵan bolatyn. Onda ornatylǵan jabdyq 600 metrden astam tereńdiktegi taý-ken qazbalaryn jeldetýdi qamtamasyz etedi.
«Jomart» kenishinde jeldetýge arnalǵan taǵy bir tik oqpannyń qurylysy jalǵasýda. Jumys aiaqtalǵannan keiin jeldetý júiesiniń múmkindigi keńeiedi. Bul taý-ken jumysyn júrgizý kezinde qaýipsizdik deńgeiin arttyryp, óndiristiń tiimdiligin jaqsartýǵa yqpal etedi.
Jeldetý infraqurylymyn damytý 2026 jyly «Qazaqmysta» jariialanǵan Qaýipsizdik jyly aiasyndaǵy jumystyń negizgi baǵyttarynyń biri bolyp tabylady. Osyndai jobalardy júzege asyrý óndiristik táýekelderdi azaitýǵa, kenshilerdiń eńbek jaǵdaiyn jaqsartýǵa jáne jer astyndaǵy óndiristik nysandardyń turaqty jumysyn qamtamasyz etýge septigin tigizedi.
