Qaraǵandy oblysynda ornalasqan «Abyz» altyn-polimetall ken ornynda geologiialyq barlaý qarqyndy júrip jatyr. Qazirgi ýaqytqa deiin 2 600 qýma metrden astam burǵylaý aiaqtaldy, bul belgilengen 5 100 metrlik jospardyń jartysynan astamyn quraidy, dep habarlaidy Ult.kz.
Joba sheńberinde tereńdigi 800-den 1 200 metrge deiin jetetin alty uńǵyma burǵylaý kózdelgen. Alynǵan kern úlgileri keshendi geologiialyq saraptamadan ótedi. Bul zertteýler ken ornynyń tereń qabattarynyń qurylymyn naqtylap, keleshegi bar ýchaskelerdi anyqtaýǵa jol ashady.
Kompaniia úshin tereń burǵylaý — mineraldyq-shikizat bazasyn keńeitýdiń negizgi tásilderiniń biri. Jumys istep turǵan ken oryndaryn tereńdete zertteý olardyń qosymsha múmkindikterin baǵalaýǵa ári geologiialyq barlaýdyń aldaǵy baǵyttaryn aiqyndaýǵa septigin tigizedi.
2026 jyly jańa basqarýshy quramnyń kelýimen «Qazaqmys» geologiialyq barlaý salasyna basymdyq berip, ózi qatysatyn óńirlerdegi keleshegi zor ýchaskelerdi igerý aýqymyn edáýir ulǵaitty.
«Abyz» ken ornyndaǵy tereń burǵylaý baǵdarlamasyn 2026 jyldyń sońyna deiin tolyq aiaqtaý josparlanǵan.
