Prezident Qasym-Jomart Toqaev buqaralyq aqparat quraldary qyzmetkerlerin marapattaý rásiminde qazaq televiziiasynyń ardageri, 106 jastaǵy Zulqiia Jumatovany «Qurmet» ordenimen marapattaý týraly sheshim qabyldaǵanyn málimdedi, dep habarlaidy ult.kz.
Memleket basshysy jýrnalisterdi kásibi merekesimen quttyqtap, olardyń Ádiletti, Taza, Qaýipsiz ári Kúshti Qazaqstandy qurý jolyndaǵy eńbegin joǵary baǵalady. Prezidenttiń aitýynsha, BAQ ókilderi qoǵamda «Zań men tártip», «Adal azamat» qaǵidattaryn ornyqtyrýǵa jáne «Taza Qazaqstan» tujyrymdamasyn keńinen nasihattaýǵa eleýli úles qosyp keledi.
Sóz barysynda Qasym-Jomart Toqaev ulttyq televiziianyń qalyptasýyna zor eńbek sińirgen Zulqiia Jumatovany erekshe atap ótti.
– Ulttyq televiziianyń alǵashqy kásibi mamandarynyń biri, qazaq tilindegi tuńǵysh efirdi júrgizgen maitalman diktor Zulqiia Jumatovany erekshe atap ótkim keledi. Búgingi tańda 106 jasqa kelgen ardaqty tulǵany halqymyz airyqsha qurmetteidi. Sondyqtan men Zulqiia Muqanqyzyna «Qurmet» ordenin tabystaý týraly sheshim qabyldadym, – dedi Prezident.
Zulqiia Jumatova qazaq televiziiasynyń alǵashqy qarlyǵashtarynyń biri sanalady. Ol qazaq tilindegi tuńǵysh efirdi júrgizip, otandyq telejýrnalistikanyń qalyptasýyna ólsheýsiz úles qosty.
Prezident sondai-aq Qazaqstan jýrnalistikasy men televiziiasynyń damýyna eleýli úles qosqan birqatar media mamandaryn memlekettik nagradalarmen marapattaý týraly Jarlyqqa qol qoiǵanyn habarlady. Marapattalǵandardyń qatarynda aqparat salasyna sanaly ǵumyryn arnaǵan ardagerler men tájiribeli jýrnalister bar.
Memleket basshysy tájiribeli jýrnalisterdiń eńbegi jas býyn úshin úlgi ekenin atap ótip, aqparat salasy mamandary aldaǵy ýaqytta da el igiligi jolynda qyzmet ete beretinine senim bildirdi.
