2018 jylǵy 24 jeltoqsannan bastap Qazaqstannyń depozitterge kepildik berý qory (QDKBQ) «Bank VTB» AQ EU agent banki arqyly «Qazaq Banki» AQ salymshylarynyń ótemaqysyn tólep jatyr, dep habarlaidy "Ult aqparat".
8 qańtardaǵy jaǵdai boiynsha, «Qazaq Banki» AQ 2 886 salymshysy agent bankke júginip, jalpy somasy 14,4 milliard teńgeni quraityn ótemaqy aldy. Bul - QDKBQ-nyń «Qazaq Banki» AQ salymshylary aldyndaǵy mindettemeleri jalpy somasynyń 71 paiyzy.
Agent bankke júgingen salymshylardyń 93 paiyzy tólemdi sol kúni aldy. Qalǵan 7 paiyzy, negizinen, múddelerin senimhat boiynsha tanytqan, ótinishteri negizinde zańdy qorytyndy talap etilgen úshinshi tulǵalar. Olar tólemdi zańnamamen belgilengen bes jumys kúni ishinde aldy. Salymshylardyń 84 paiyzy aqshany agent banktiń kassasynda qolma-qol alsa, 16 paiyzy agent banktegi nemese basqa da banktegi bank shotyna aýdartty.
Qazirgi tańda QDKBQ-nyń jalpy mindettemeler somasynan tólenbegen 29 paiyzy - kepildik berilgen ótemdi alýǵa áli júginbegen 15 myń salymshynyń aqshasy. «Qazaq Banki» AQ salymshylary 2019 jyldyń 24 maýsymyna deiin agent bankke kez kelgen ýaqytta júgine alady. Budan keiin ótinishti tikelei QDKBQ-ǵa berýge bolady.
Tólem júrgizýdiń birinshi aptasynyń qorytyndysy boiynsha QDKBQ-nyń, agent bank pen «Qazaq Banki» AQ-nyń taratý komissiiasynyń koll-ortalyqtaryna 1 300 ret qońyraý shalyndy. «Qazaq Banki» AQ salymshylarynan 25 shaǵym tústi. Agent bank bólimshelerinde jumysty uiymdastyrý, bólimshelerdegi kezekter, kassany qolma-qol aqshamen toltyrýdy kútý siiaqty máseleler boiynsha shaǵymdar túsken bolatyn. QDKBQ men agent bank jumyskerleri árbir shaǵym boiynsha máselelerdi sheshý úshin búkil qajetti jumysty júrgizdi.
Bank VTB filialdary men bólimsheleriniń tizimimen myna veb-saitta tanysýǵa bolady: www.vtb-bank.kz. Filialdar men bólimshelerdiń jumysy týraly aqparatty 5050 qysqa nómir boiynsha ala alasyzdar (uialy telefonnan qońyraý shalý tegin).
Depozitter boiynsha kepildik berý, ótemaqyny tóleýdi júzege asyrý tártibi, ótemaqy somasyn esepteý týraly barlyq máseleler boiynsha «Qazaq Banki» AQ salymshylaryna QDKBQ bailanys ortalyǵynyń qysqa nómirine 1460 habarlasýyna, sondai-aq, info@kdif.kz elektrondy poshtasy boiynsha, www.kdif.kz veb-saitynda saýaldaryn qaldyrýǵa nemese @kdif_ask Telegram-chaty arqyly suraq qoiýyna bolady.
Valiýtany aiyrbastaý baǵamy, syiaqyny esepteý men kapitalǵa ainaldyrý, taratylatyn bank aldyndaǵy kepildik berilgen somasy men mindettemeler somasyn esepke alý siiaqty tólem somasyn esepteýmen bailanysty suraqtar týyndaǵan jaǵdaida, salymshylar «Qazaq Banki» AQ-nyń taratý komissiiasyna júginý kerek.
«Qazaq Banki» AQ taratý komissiiasy jeke jáne zańdy tulǵalardyń ótinishterin 2019 jyldyń 21 aqpanyna deiin qabyldaidy.
