Ýkrainalyq rejisser Igor Lopatenok QR Tuńǵysh Prezidenti-Elbasy Nursultan Nazarbaev týraly «Qazaq. Altyn adam tarihy» filmi teledidarǵa jol tartpas buryn kinoteatrlarda kórsetiletinin aitty, dep habarlaidy QazAqparat.
«Biz film aldymen kinoteatrlarda kórsetilip, sodan keiin ǵana teledidarǵa shyǵady dep úmittenemiz. Bul qalai bolatynyn kóremiz. Týyndynyń naǵyz baǵasyn kórermen beredi. Jalǵyz ólshem – osy. Men búgin baspasóz máslihatynda aittym, synshylardyń aitqanyn oqymaimyn. Sebebi olar eshqashan ózderi film túsirmeidi. Biz bul sýretti synshylar úshin emes, kórermen úshin jasadyq. Biz úshin tek kórermenniń pikiri mańyzdy», - dedi Igor Lopatenok BAQ ókilderine.
Rejisser týyndynyń neǵurlym aýqymdy aýditoriia jinaýyna múddeli ekenin aitty.
«Biz film meilinshe kóp aýditoriiaǵa jetýi úshin toǵyz ai boiy qoldaý kórsetemiz. Film tanymaldyǵynyń sharyqtaý shegi 2022 jyldyń sáýirine keledi dep oilaimyn. Týyndynyń búgingi nusqasy kinoteatrlarǵa arnap jasalǵan. Meniń oiymsha, osyndai qalyp kóptegen jyldar boiy ózekti bolady», - deidi avtor.
