Almatynyń Túrksib aýdanynda qaza tapqan 12 jastaǵy Abylaihan Erjanulynyń ólimine qatysty jańa málimetter jariialandy, dep habarlaidy ult.kz.
Marqumnyń týystarynyń aitýynsha, oqiǵa 10 maýsym kúni keshke bolǵan. Sol kúni jetinshi synypta oqityn eki oqýshy altynshy synypty endi ǵana támamdaǵan Abylaihandy kezdesýge shaqyrǵan. Olardyń biri balany ekinshisiniń úiine aldap aparǵan.
Ájesiniń sózinshe, oqýshyǵa asúi pyshaǵymen toǵyz ret pyshaq jaraqaty salynǵan. Bala oqiǵa ornynda kóz jumǵan. Týystarynyń aitýynsha, olarǵa nemeresiniń jatqan jeri týraly habarlanyp, olar dereý barǵanymen, jedel járdem qyzmetkerleri onyń qaitys bolǵanyn rastaǵan.
Marqumnyń jaqyndary qylmystyń sebebi áli túsiniksiz ekenin aitady. Abylaihan karatemen ainalysqan, qara belbeý iegeri bolǵan jáne mektepte eshqandai másele týǵyzbaǵan. Qaiǵyly jaǵdaidan keiin kúdikti jasóspirimniń ata-anasy keshirim suraýǵa kelgenimen, otbasy olardy qabyldamaǵan.
Sonymen qatar týystaryn kúdiktiniń 13 jasta bolýy alańdatyp otyr. Olar jasóspirimniń jaýapkershilikten qutylyp ketýi múmkin degen aqparatqa narazylyq bildirgen.
Politsiia málimetinshe, kámeletke tolmaǵandar arasynda janjal týyndap, sonyń saldarynan jasóspirim pyshaq jaraqatyn alǵan. Qylmystyq is qozǵalyp, 13 jastaǵy kúdikti arnaiy mekemege ornalastyrylǵan. Sondai-aq onyń ata-anasynyń balany tárbieleý mindetin tiisinshe oryndamaǵany úshin jaýapkershilikke tartylý máselesi qaralady.
