Aqordada Prezident Qasym-Jomart Toqaev Polsha Respýblikasy Senatynyń Marshaly Malgojata Kidava-Blonskamen kezdesti, dep habarlaidy ult.kz.
Kezdesý barysynda ekijaqty yntymaqtastyqty nyǵaitý jáne qos eldiń zań shyǵarýshy organdary arasyndaǵy bailanysty keńeitý máseleleri talqylandy.
– Álemdegi ekonomikasy iri elderdiń jiyrmalyǵyna enetin Polshamen yqpaldastyqty ilgeriletýge erekshe mán beremiz. Memleketterimiz arasynda diplomatiialyq qarym-qatynas ornaǵan sátten beri shynaiy dostyq bailanystar qalyptasty. Parlamentaralyq dialog josparly ári tabysty túrde damyp keledi, – dedi Memleket basshysy.
Áńgimelesý barysynda tarihi tamyrlastyqqa airyqsha nazar aýdaryldy. Prezident kórnekti poliak etnografy Adolf Ianýshkevichtiń qazaq tarihyn, turmysy men mádenietin zertteýge zor úles qosqanyn atap ótti.
Qasym-Jomart Toqaev oraily sátti paidalana otyryp, Polsha Prezidenti Karol Navrotskiige jáne Premer-ministr Donald Týskke ystyq yqylasyn joldady.
Malgojata Kidava-Blonska qonaqjailyq tanytqany úshin Memleket basshysyna shynaiy rizashylyǵyn bildirdi.
– Sizben kezdesýdi úlken mártebe sanaimyn. Qazaqstanǵa jasaǵan alǵashqy saparymnyń máni erekshe. Biz elińizge poliak halqy úshin eleýli kezeńde kelip otyrmyz. Iaǵni otandastarymyzdyń osy jerge kúshtep jer aýdarylǵanyna 90 jyl toldy. Olarǵa qazaq halqy súieý bolyp, qily zamanda qol ushyn sozdy. Bizdi ortaq tarih qana emes, keleshektegi mol múmkindikter de biriktiredi. Polsha úshin aimaqtaǵy jetekshi elderdiń biri sanalatyn Qazaqstanmen yntymaqtastyqty damytý asa mańyzdy, – dedi Senat Marshaly.
