Memleket basshysy Qasym-Jomart Toqaev Eńbek jáne halyqty áleýmettik qorǵaý ministri Asqarbek Ertaevti qabyldap, vedomstvonyń 2025 jylǵy jumysynyń qorytyndylary men 2026 jyldyń alǵashqy bes aiyndaǵy nátijeleri týraly esebin tyńdady, dep habarlaidy ult.kz.
Kezdesý barysynda ministr memleket tarapynan kózdelgen áleýmettik mindettemeler tolyq kólemde oryndalyp jatqanyn málimdedi. Onyń aitýynsha, 2025 jyly zeinetaqy, bazalyq járdemaqy jáne ózge de áleýmettik tólemderge 5,9 trillion teńge jumsalsa, biylǵy bes aida bul maqsatqa 2,7 trillion teńge baǵyttalǵan.
Asqarbek Ertaev múmkindigi shekteýli azamattardy qoldaý jáne olardy jumyspen qamtý sharalary týraly da baiandady. Biyl 12 myńǵa jýyq múgedektigi bar azamat eńbekke tartylǵan. Sonymen qatar jyl sońyna deiin múgedektikti belgileýdiń tsifrlyq taldaý tetigin engizý josparlanyp otyr.
Prezident arnaýly áleýmettik qyzmetterdiń sapasyn arttyrýdy jáne elimizdiń óńirlerinde jeti jańa ońaltý ortalyǵyn ashýdy tapsyrdy. Bul erekshe qajettiligi bar azamattarǵa kórsetiletin qyzmetterdiń qoljetimdiligin keńeitýge múmkindik beredi.
Ministr halyqty jumyspen qamtý baǵytyndaǵy jumystarǵa da toqtaldy. Onyń málimetinshe, el boiynsha 201 myńǵa jýyq adam jumyspen qamtylǵan, olardyń 74,9 myńy – jastar. Sondai-aq biyl turaqty, qaýipsiz ári áleýmettik kepildikteri saqtalatyn jumys oryndarynyń sanyn 3,1 millionǵa deiin jetkizý mindeti qoiylǵan.
Kezdesýde eńbek naryǵyn tsifrlandyrý máselesi de talqylandy. Atap aitqanda, Mańǵystaý oblysy men Pavlodar oblysynda «Jumyspen qamtýdyń tsifrlyq qyzmeti» jobasyn pilottyq rejimde iske qosý josparlanyp otyr.
Eńbek qatynastaryn retteý salasynda elektrondyq formatta 6,7 million eńbek sharty jasalǵany aityldy. Sonymen qatar 118 myńnan astam jumysker mindetti saqtandyrýmen qamtylǵan. Eńbek inspektorlarynyń aralasýymen 22 myńnan astam azamattyń quqyǵy qorǵalǵan.
Kezdesý qorytyndysynda Prezident salany odan ári tsifrlandyrý, eńbek adamdarynyń quqyqtaryn qorǵaý, áleýmettik qoldaýdy kúsheitý jáne áleýmettik masyldyqpen kúres baǵytynda birqatar tapsyrma berdi.
Memleket basshysy qabyldanatyn barlyq sheshimder men sharalar halyqtyń ál-aýqatyn arttyrýǵa qyzmet etýi tiis ekenin atap ótti.
